संगमनेरच्या आरोग्य सेवेत मोठी भर: आमदार सत्यजीत तांबे यांच्या पाठपुराव्याला यश, नवीन ‘सेवा दवाखाने’ मंजूर!

संगमनेर, प्रतिनिधी – 
संगमनेर तालुक्यातील कामगार आणि मध्यमवर्गीय विमाधारकांसाठी आमदार सत्यजीत तांबे यांनी एक मोठी आनंदाची बातमी दिली आहे. गेल्या अनेक दिवसांपासून प्रलंबित असलेल्या आरोग्य सुविधेच्या प्रश्नावर तोडगा निघाला असून, नागपूर विभागातील बंद पडलेले ‘सेवा दवाखाने’ आता संगमनेरमध्ये स्थलांतरित करण्यास प्रशासकीय मंजुरी मिळाली आहे. आमदार तांबे यांनी राज्य आणि केंद्र सरकारकडे केलेल्या सातत्यपूर्ण पाठपुराव्यामुळे हा ऐतिहासिक निर्णय घेण्यात आला असून, यामुळे तालुक्यातील १० हजार कुटुंबांना हक्काची आरोग्य सेवा मिळणार आहे.
महाराष्ट्र राज्य विमा प्रतिष्ठानच्या (महा-राकावि) नाशिक क्षेत्रीय कार्यालयाने ४ जून २०२५ रोजी या संदर्भातील अधिकृत आदेश निर्गमित केले आहेत. या निर्णयानुसार, नागपूर कार्यालयाच्या कार्यक्षेत्रातील ‘महाल’ आणि ‘न्यू सेक्टर’ या भागांतील बंद करण्यात आलेले सेवा दवाखाने आता संगमनेरमध्ये हलवले जाणार आहेत. संगमनेर परिसरात विमाधारक लाभार्थ्यांची संख्या मोठी असूनही त्यांना पुरेशी वैद्यकीय व्यवस्था उपलब्ध नव्हती. ही गरज ओळखून तांबे यांनी शासनाकडे या दवाखान्यांच्या मागणीसाठी तांत्रिक आणि प्रशासकीय पातळीवर लढा दिला होता.
संगमनेरमध्ये सध्या सुमारे १०,००० नोंदणीकृत विमाधारक लाभार्थी आहेत. या नव्या सेवा दवाखान्यांमुळे या लाभार्थ्यांना आणि त्यांच्या कुटुंबीयांना स्थानिक पातळीवरच त्वरित आणि उच्च दर्जाच्या आरोग्य सुविधा मिळतील. यामध्ये मोफत औषधोपचार, प्राथमिक तपासण्या आणि तज्ज्ञ डॉक्टरांचा सल्ला यांचा समावेश असेल. यापूर्वी अनेक विमाधारकांना किरकोळ उपचारांसाठीही नाशिक किंवा पुण्यासारख्या मोठ्या शहरांकडे धाव घ्यावी लागत होती, ज्यामुळे कष्टकरी वर्गाचा मोठा वेळ आणि कष्टाचा पैसा खर्च होत होता. आता ही अडचण कायमची दूर होणार आहे .
आमदार तांबे यांच्या या यशामुळे संगमनेर परिसरातील सार्वजनिक आरोग्य व्यवस्थेला नवीन उभारी मिळणार आहे. स्थानिक नागरिकांच्या मते, केवळ रस्ते आणि पाणी नव्हे तर आरोग्य सुविधांमध्येही संगमनेर आता स्वयंपूर्ण होत आहे. नागरी सुविधांच्या विकासाचा हा सकारात्मक संदेश तालुक्याच्या कानाकोपऱ्यात पोहोचला असून, प्रशासनाने आता हे दवाखाने प्रत्यक्ष इमारतीत कार्यान्वित करण्यासाठी हालचाली सुरू केल्या आहेत.
📌 आमच्या भागातील कामगार वर्गाचे आरोग्य सुरक्षित राहावे, यासाठी आम्ही कटिबद्ध आहोत. नागपूरमधील बंद सुविधा संगमनेरमध्ये आणणे हे मोठे आव्हान होते, परंतु केंद्र आणि राज्य सरकारकडे केलेल्या यशस्वी पाठपुराव्यामुळे हे शक्य झाले. ही केवळ आरोग्य सेवा नसून, ती कष्टकऱ्यांच्या आयुष्याला दिलेली एक सुरक्षा आहे. ‘संगमनेर २.०’ च्या माध्यमातून आम्ही जो शाश्वत आणि सर्वसमावेशक विकासाचा संकल्प सोडला आहे, त्याचाच हा एक भाग आहे. – सत्यजित तांबे, आमदार.