संगमनेर, प्रतिनिधी –
बोटा येथील स्व. शेखर शेळके यांनी क्रिकेट खेळाप्रती दाखवलेली निष्ठा आणि त्यांचे योगदान आजही पठार भागात स्मरणात आहे. त्यांच्या निधनानंतर त्यांच्या स्मृतींना उजाळा देण्यासाठी शिवसेनेचे माजी जिल्हा परिषद सदस्य जनार्दन आहेर यांनी ‘स्व. शेखर शेळके चषक २०२६’ आयोजित करून त्यांच्या कार्याचा खऱ्या अर्थाने गौरव केला असल्याचे गौरवोद्गार आमदार अमोल खताळ यांनी काढले.
घारगाव येथे स्व. म्हातारबा लक्ष्मण आहेर प्रतिष्ठान संचलित धर्मवीर छत्रपती क्रिकेट क्लबच्या वतीने या भव्य टेनिस बॉल क्रिकेट स्पर्धेचे आयोजन करण्यात आले आहे. या स्पर्धेचा शुभारंभ आमदार अमोल खताळ आणि स्व. शेखर शेळके यांच्या मातोश्री नंदा शेळके यांच्या उपस्थितीत पार पडला.
यावेळी शिवसेना तालुका प्रमुख रामभाऊ राहणे, भाजपचे तालुकाध्यक्ष गुलाब भोसले, माजी जिल्हा परिषद सदस्य जनार्दन आहेर, सरपंच नितीन आहेर, उपसरपंच रेश्मा धात्रक, चंद्रकांत घुले, संतोष शेळके, सुहास वाळुंज, रमेश आहेर, सर्जेराव ढमढेरे, सुरेश गाडेकर, हारून शेख यांच्यासह पठार भागातील अनेक मान्यवर मोठ्या संख्येने उपस्थित होते.
याप्रसंगी बोलताना आमदार खताळ पुढे म्हणाले की, जनार्दन आहेर यांनी या स्पर्धेच्या माध्यमातून तरुणांना केवळ एक सशक्त व्यासपीठच उपलब्ध करून दिले नाही, तर खेळाच्या माध्यमातून नेतृत्व घडवण्याचे कामही केले आहे. स्व. शेखर शेळके यांनी अनेक वर्षे क्रिकेट स्पर्धांसाठी घेतलेला पुढाकार आजही प्रेरणादायी असून, या स्पर्धेच्या निमित्ताने त्यांचे नाव कायम जिवंत राहणार आहे. संगमनेर तालुक्यात झालेल्या राजकीय परिवर्तनानंतर आता गावोगावी क्रिकेटचे आयोजन होत असून, खेळाडूंना प्रोत्साहन मिळत आहे.
पठार भागाच्या सर्वांगीण विकासासाठी जनार्दन आहेर यांनी नेहमीच संघर्ष केला असून, त्यांच्या या कार्याचे आमदार खताळ यांनी कौतुक केले. या स्पर्धेमुळे स्थानिक खेळाडूंमध्ये उत्साहाचे वातावरण असून, भविष्यातही अशा स्पर्धांचे आयोजन सातत्याने सुरू राहील असा विश्वास त्यांनी व्यक्त केला. कार्यक्रमाचे प्रास्ताविक हारून शेख यांनी केले, तर जनार्दन आहेर यांनी उपस्थितांचे आभार मानले.
