संगमनेर बस स्थानकाच्या वैभवात पडणार भर; आमदार सत्यजित तांबेंचा बसस्थानक विकासासाठी मास्टरप्लॅन! परिवहन मंत्री प्रताप सरनाईकांची भेट, बैठकीत या प्रश्नांवर चर्चा; मंत्री सरनाईक म्हणाले…

मुंबई: विशेष प्रतिनिधी

संगमनेर शहराच्या वैभवात भर घालणाऱ्या आणि अत्याधुनिक सोयी-सुविधांनी सज्ज असलेल्या संगमनेर बसस्थानक परिसरातील प्रलंबित प्रश्न मार्गी लावण्यासाठी आमदार सत्यजित तांबे यांनी कंबर कसली आहे. राज्याचे परिवहन मंत्री प्रतापजी सरनाईक यांची भेट घेऊन आमदार तांबे यांनी बसस्थानक परिसरातील विविध समस्यांचे निवेदन सादर केले. 

आमदार तांबे यांनी यासंदर्भात महत्त्वाचे ट्विट करत माहिती दिली. या भेटीदरम्यान त्यांनी मांडलेल्या सर्व मागण्यांकडे मंत्री प्रताप सरनाईक यांनी सकारात्मक लक्ष दिले असून, लवकरच यावर ठोस अंमलबजावणी करण्याचे आश्वासन दिले असल्याचे म्हटले आहे.

https://x.com/i/status/2018255157272904060

संगमनेर बसस्थानक परिसरात छत्रपती शिवाजी महाराज यांचा भव्य अश्वारूढ पुतळा प्रस्तावित आहे. या स्मारकाची भव्यता लक्षात घेता त्यासाठी वाढीव जागेची गरज असून, ती तातडीने उपलब्ध करून देण्याची आग्रही मागणी तांबे यांनी यावेळी केली. स्मारकामुळे शहराच्या सौंदर्यात आणि अस्मितेत भर पडणार असल्याने याला प्राधान्य मिळावे, अशी भूमिका त्यांनी मांडली. 

याचबरोबर बसस्थानक परिसरात होणारे सार्वजनिक कार्यक्रम आणि अनधिकृत फ्लेक्सबाजीमुळे प्रवाशांची मोठी गैरसोय होते. संगमनेर नगरपालिकेने याला पायबंद घालण्याचा निर्णय घेतला असून, परिवहन विभागानेही आपल्या स्थानिक अधिकाऱ्यांना याबाबत कडक सूचना द्याव्यात, जेणेकरून बसस्थानकाचे पावित्र्य राखले जाईल, असेही त्यांनी निदर्शनास आणून दिले.

बसस्थानकातील पार्किंग व्यवस्था आणि वाढते अतिक्रमण हा प्रवाशांच्या दृष्टीने कळीचा मुद्दा ठरत आहे. तांबे यांनी या संदर्भात पार्किंग सुविधा तात्काळ कार्यान्वित करण्याची आणि अतिक्रमणांबाबत कडक नियमांची अंमलबजावणी करण्याची मागणी केली आहे. विशेष म्हणजे, सामाजिक बांधिलकी जपत बसस्थानक संकुलात अपंग लाभार्थ्यांसाठी आरक्षित असलेले गाळे अद्यापही प्रलंबित असून, ते संबंधित लाभार्थ्यांना विनाविलंब हस्तांतरित करावेत, अशी मागणी त्यांनी लावून धरली.

विमानतळाच्या धर्तीवर बांधण्यात आलेल्या या बसस्थानकाच्या नियमित स्वच्छतेचा प्रश्नही त्यांनी मंत्र्यांसमोर मांडला. इतक्या उच्च दर्जाच्या वास्तूची नियमित देखभाल आणि स्वच्छता राखणे आवश्यक असल्याचे त्यांनी सांगितले. आमदार सत्यजित तांबे यांच्या या पाठपुराव्यामुळे संगमनेर बसस्थानकाचा चेहरामोहरा बदलण्याची चिन्हे असून, प्रवाशांना आणि स्थानिकांना लवकरच दिलासा मिळणार आहे. या बैठकीमुळे संगमनेरच्या विकासाला नवी गती मिळेल, असा विश्वास व्यक्त केला जात आहे.