पद्मश्री रघुवीर खेडकर यांचा रविवारी संगमनेरमध्ये भव्य नागरी सत्कार; आमदार सत्यजित तांबे यांची माहिती

संगमनेर, प्रतिनिधी –

संगमनेर तालुक्याचे भूषण आणि ज्येष्ठ लोककलावंत रघुवीर खेडकर यांना केंद्र सरकारचा ‘पद्मश्री’ पुरस्कार जाहीर झाल्याबद्दल, तालुक्यातील सर्वपक्षीय नागरिक आणि विविध संघटनांच्या वतीने रविवारी, (८ फेब्रुवारी) दुपारी ३ वाजता कवी अनंत फंदी खुले नाट्यगृह येथे भव्य नागरी सत्कार सोहळ्याचे आयोजन करण्यात आले आहे.

आमदार सत्यजित तांबे यांनी या कार्यक्रमाबाबत माहिती देताना सांगितले की, स्वर्गीय कांताबाई सातारकर आणि रघुवीर खेडकर यांनी तमाशा लोककलेच्या माध्यमातून संगमनेरचे नाव महाराष्ट्राच्या कानाकोपऱ्यात पोहोचवले आहे. त्यांच्या या समर्पित जीवनकार्याचा गौरव करण्यासाठी संपूर्ण तालुका सरसावला आहे.

हा सोहळा महाराष्ट्राचे माजी मंत्री लोकनेते बाळासाहेब थोरात यांच्या अध्यक्षतेखाली आणि ज्येष्ठ विचारवंत प्रा. डॉ. रावसाहेब कसबे यांच्या हस्ते होणार आहे. याप्रसंगी माजी आमदार डॉ. सुधीर तांबे, प्रसिद्ध उद्योगपती राजेश मालपाणी, माजी नगराध्यक्ष दुर्गाताई तांबे, नगराध्यक्षा डॉ. मैथिलीताई तांबे, उपनगराध्यक्ष नूर मोहम्मद शेख आणि डॉ. जयश्रीताई थोरात यांची प्रमुख उपस्थिती लाभणार आहे.

या ऐतिहासिक सोहळ्यासाठी संगमनेरमधील विविध संस्थांचे पदाधिकारी, सामाजिक, सांस्कृतिक व सेवाभावी संघटनांचे प्रतिनिधी, पत्रकार, कला व क्रीडा रसिक, तसेच मोठ्या संख्येने महिला व युवक उपस्थित राहणार आहेत. रघुवीर खेडकर गौरव समितीच्या वतीने तालुक्यातील सर्व कलाप्रेमी नागरिकांनी या कार्यक्रमाला मोठ्या संख्येने उपस्थित राहून आपल्या लाडक्या कलावंताचा सन्मान करावा, असे आवाहन करण्यात आले आहे.