संगमनेर, प्रतिनिधी –
तेलंगणा राज्यातील संगारेड्डी जिल्ह्यातील तेल्लारपूर येथे सामाजिक क्रांतीचे अग्रदूत क्रांतिसूर्य महात्मा ज्योतिराव फुले यांच्या पुतळ्याची काही समाजकंटकांनी तोडफोड करून विटंबना केली. या घटनेचे पडसाद संगमनेर शहरात उमटले असून, राहुल गांधी समर्थक संघाच्या वतीने बस स्थानक परिसरात आज दुपारी ३ वाजता तीव्र निषेध आंदोलन करण्यात आले.
देशातील अस्पृश्यता, सतीप्रथा आणि जातीभेदाविरुद्ध लढा देऊन बहुजन समाज, महिला व शेतकऱ्यांना शिक्षणाची दारे उघडणाऱ्या महापुरुषाच्या पुतळ्यावर झालेला हा हल्ला अत्यंत खेदजनक आणि गंभीर स्वरूपाचा आहे. हा केवळ एका पुतळ्यावर झालेला हल्ला नसून तो सामाजिक समता आणि मानवतावादी विचारांवर झालेला आघात आहे, अशा भावना यावेळी व्यक्त करण्यात आल्या. या घटनेमुळे संपूर्ण देशातील फुलेप्रेमींच्या भावना दुखावल्या गेल्या असून, तेलंगणा सरकारने या प्रकरणाची सखोल चौकशी करून दोषींवर कठोर कायदेशीर कारवाई करावी, अशी मागणी आंदोलकांनी केली आहे.
या निषेध आंदोलनात माजी नगरसेविका प्रमिला अभंग, राहुल गांधी समर्थक संघाचे राम अरगडे, अमोल शेलकर, अनिल गोडसे, सतीश खताळ, अरुण चव्हाण, प्रकाश कडलग, शंतनू भालेकर यांच्यासह छात्र भारतीचे प्रदेशाध्यक्ष अनिकेत घुले व त्यांची संपूर्ण कार्यकारिणी मोठ्या संख्येने सहभागी झाली होती.
