नगराध्यक्षा मैथिली तांबे निळवंडे धरणाच्या ‘फिल्ड’वर! संगमनेर शहराच्या पाणीपुरवठा योजनांची युद्धपातळीवर पाहणी

संगमनेर:

संगमनेर शहराच्या भविष्यातील गरजा आणि वाढती लोकसंख्या लक्षात घेता, शहराला नियमित, स्वच्छ आणि पुरेसा पाणीपुरवठा व्हावा या उद्देशाने नगराध्यक्षा मैथिली तांबे यांनी शुक्रवारी महत्त्वपूर्ण पाहणी दौरा केला. या दौऱ्यात त्यांनी निळवंडे धरणापासून शहराकडे येणाऱ्या मुख्य पाईपलाईनची तसेच धरणाजवळील बॉल व्हॉल्व्हची प्रत्यक्ष पाहणी करून सद्यस्थितीचा आढावा घेतला. यावेळी त्यांनी उपस्थित अधिकाऱ्यांशी तांत्रिक बाबींवर सविस्तर चर्चा करून कामात सुधारणा करण्याच्या आवश्यक सूचना दिल्या.

शहराच्या पाणीपुरवठा सुविधेला अधिक बळकट करण्यासाठी प्रस्तावित असलेल्या नवीन जलशुद्धीकरण प्रकल्पाच्या जागेचीही यावेळी पाहणी करण्यात आली. या जागेची निश्चिती केल्यानंतर नगराध्यक्षांनी संगमनेर नगरपरिषदेच्या पंपिंग स्टेशनला भेट देऊन तेथील कामकाजाची माहिती घेतली. या संपूर्ण पाहणी दौऱ्यात माजी नगराध्यक्ष दुर्गाताई तांबे यांचे मोलाचे मार्गदर्शन लाभले. शहराचा दीर्घकालीन विकास आणि सक्षम पायाभूत सुविधांची उभारणी करणे हेच प्रशासनाचे मुख्य ध्येय असल्याचे यावेळी मैथिली तांबे यांनी स्पष्ट केले. तसेच पाणीपुरवठ्याशी संबंधित प्रशासकीय कामांना अधिक गती देण्याचे निर्देश त्यांनी दिले.

या पाहणी दौऱ्याप्रसंगी नगरपरिषद पाणीपुरवठा समितीचे सभापती मुजीब खान पठाण, पाणीपुरवठा अभियंता अमृत काजवे यांच्यासह नगरसेवक, पाणीपुरवठा विभागाचे कर्मचारी व इतर संबंधित उपस्थित होते. संगमनेरकरांना कोणत्याही पाणीटंचाईचा सामना करावा लागू नये, यासाठी नगरपरिषद प्रशासन आता युद्धपातळीवर प्रयत्न करत आहे.