संगमनेर, प्रतिनिधी –
अखंड महाराष्ट्राचे आराध्य दैवत छत्रपती शिवाजी महाराज यांच्या जयंतीनिमित्त आज (१९ फेब्रुवारी २०२६) संगमनेर नगरपरिषदेच्या वतीने शहरात भव्य ‘शिवजन्मोत्सव रॅली’चे आयोजन करण्यात आले आहे. ‘शिवरायांच्या विचारांचा जागर’ करण्याच्या उद्देशाने आयोजित करण्यात आलेल्या या रॅलीत संगमनेरमधील सर्व शिवप्रेमींनी मोठ्या संख्येने सहभागी व्हावे, असे आवाहन प्रशासनाच्यावतीने करण्यात आले आहे.
ही भव्य रॅली सकाळी ठीक ८:३० वाजता संगमनेर नगरपरिषद कार्यालयापासून उत्साहात सुरू होत आहे. नगरपरिषदेच्या नगराध्यक्षा डॉ. मैथिली सत्यजीत तांबे, उपनगराध्यक्ष तथा सभापती नियोजन आणि विकास समिती नूर मोहम्मद शेख आणि मुख्याधिकारी दयानंद दादासाहेब गोरे यांच्या प्रमुख उपस्थितीत व मार्गदर्शनाखाली या सोहळ्याचे नियोजन करण्यात आले आहे.
रॅलीच्या मार्गाबाबत माहिती देताना आयोजकांनी सांगितले की, ही रॅली संगमनेर नगरपरिषद कार्यालयापासून सुरू होऊन बाजारपेठ, तेलीखुंट, सय्यदबाबा चौक, मेनरोड, चावडी आणि मोमीनपुरा या मुख्य भागांतून मार्गक्रमण करत छत्रपती शिवाजी महाराज पुतळा येथे पोहोचेल, तिथे रॅलीची सांगता होईल. शिवजयंतीचा हा उत्सव शिस्तबद्ध आणि उत्साही वातावरणात साजरा करण्यासाठी नगरपरिषदेने जय्यत तयारी केली असून, शहरातील नागरिकांनी या ऐतिहासिक सोहळ्याचे साक्षीदार व्हावे, असे आवाहन करण्यात आले आहे.
