संगमनेर, प्रतिनिधी –
लोकनेते बाळासाहेब थोरात यांच्या मार्गदर्शनाखाली संगमनेर बसस्थानकासमोर महाराजांचा भव्य अश्वारूढ पुतळा लवकरच उभारला जाणार असून येत्या वर्षभरात या पुतळ्याचे काम पूर्ण करून पुढच्या वर्षीची जयंती याच ठिकाणी साजरी केली जाईल. यासोबतच भारतरत्न डॉ. बाबासाहेब आंबेडकर यांचा पूर्णकृती पुतळा, संविधान स्मारक आणि १०० फूट उंचीचा भव्य तिरंगा उभारून बसस्थानक परिसराचे सौंदर्यीकरण करण्यासाठी शासन दरबारी पाठपुरावा सुरू असल्याचे आमदार सत्यजित तांबे यांनी सांगितले.
शिवजयंती निमित्त शहरात छत्रपती शिवाजी महाराजांची भव्य मिरवणूक मोठ्या उत्साहात पार पडली. ढोल-ताशांचा गजर, पारंपारिक वेशभूषा आणि मर्दानी खेळांच्या सादरीकरणाने संपूर्ण शहर शिवमय झाले होते. या निमित्ताने आयोजित कार्यक्रमात बोलताना आमदार सत्यजित तांबे यांनी ही महत्त्वपूर्ण घोषणा केली.
आमदार तांबे पुढे म्हणाले की, छत्रपती शिवाजी महाराज हे जगाचे आराध्य दैवत असून त्यांचा विचार प्रत्येक पिढीसाठी प्रेरणादायी आहे.
नगरपालिकेच्या नगराध्यक्षा डॉ. मैथिलीताई तांबे यांनी यावेळी आपले मनोगत व्यक्त करताना सांगितले की, शिवरायांचे विचार घेऊन संगमनेर शहर आदर्श करण्यासाठी प्रशासन आणि नागरिक कटिबद्ध आहेत. माजी आमदार डॉ. सुधीर तांबे आणि माजी नगराध्यक्ष दुर्गाताई तांबे यांनीही यावेळी नागरिकांना शिवजयंतीच्या शुभेच्छा दिल्या.
संगमनेर नगरपरिषद, संभाजी ब्रिगेड, मराठा महासंघ आणि विविध सामाजिक संघटनांच्या वतीने निघालेली ही मिरवणूक बाजारपेठ, सय्यद बाबा चौक, तेली खुंट आणि मेनरोड मार्गे काढण्यात आली. मिरवणुकीत सर्व नगरसेविकांनी पारंपारिक फेटे परिधान केले होते. अश्वारूढ बाल शिवाजी, मर्दानी खेळ आणि जागोजागी झालेली पुष्पवृष्टी व फटाक्यांची आतिषबाजी हे मिरवणुकीचे मुख्य आकर्षण ठरले. ‘हर हर महादेव’ आणि ‘छत्रपती शिवाजी महाराज की जय’ या घोषणांनी संपूर्ण संगमनेर नगरी दुमदुमून गेली होती.
या सोहळ्याला नगराध्यक्ष डॉ. मैथिलीताई तांबे, मुख्याधिकारी दयानंद गोरे उपनगराध्यक्ष नूर मोहम्मद शेख यांच्यासह नगरसेवक, पदाधिकारी, कार्यकर्ते आणि हजारो शिवभक्त उपस्थित होते.
शहरासोबतच तालुक्यातही शिवजयंतीचा उत्साह दिसून आला. सहकार महर्षी भाऊसाहेब थोरात सहकारी साखर कारखाना, अमृत उद्योग समूह आणि यशोधन कार्यालय येथेही महाराजांना अभिवादन करण्यात आले. तर विविध सहकारी संस्थांमध्येही उत्साहात जयंती साजरी करण्यात आली.
