जागतिक महिला दिनानिमित्त संगमनेरात रंगणार क्रिकेट, बॅडमिंटन व रस्सीखेचचा थरार; डॉ. जयश्रीताई थोरात यांची माहिती

संगमनेर | प्रतिनिधी
जागतिक महिला दिनाचे औचित्य साधून आणि महिला व युवतींच्या सक्षमीकरणाचा वारसा पुढे चालवत, संगमनेरमध्ये एकविरा फाउंडेशनच्या वतीने भव्य क्रीडा महोत्सवाचे आयोजन करण्यात आले आहे. या महोत्सवाअंतर्गत ७ मार्च ते १२ मार्च २०२६ या कालावधीत टेनिस बॉल क्रिकेट, रस्सीखेच आणि बॅडमिंटन स्पर्धा रंगणार आहेत
काँग्रेसच्या राष्ट्रीय कार्यकारिणीचे सदस्य व ज्येष्ठ नेते बाळासाहेब थोरात यांच्या मार्गदर्शनाखाली आणि एकविरा फाउंडेशनच्या संस्थापक अध्यक्षा कॅन्सरतज्ञ डॉ. जयश्रीताई थोरात यांच्या पुढाकारातून संगमनेर मध्ये या स्पर्धा होत आहेत. सहकारमहर्षी भाऊसाहेब थोरात क्रीडा संकुल येथे होणाऱ्या या स्पर्धांचे हे सलग पाचवे वर्ष असून, अल्पावधीतच या उपक्रमाने राज्यस्तरावर आपली वेगळी ओळख निर्माण केली आहे. शालेय विद्यार्थिनींपासून ते ६५ वर्षांच्या ज्येष्ठ महिलांपर्यंत सर्व वयोगटातील भगिनी या स्पर्धेत मोठ्या उत्साहाने सहभागी होत असतात. भारतीय महिला क्रिकेट संघाने मिळवलेल्या जागतिक यशामुळे ग्रामीण भागातील मुलींमध्येही क्रिकेटची ओढ वाढली असून, तीच ऊर्जा या स्पर्धेत पाहायला मिळणार आहे.
या स्पर्धेचे नियोजन तीन गटांत करण्यात आले असून, यात पहिली ते दहावी (लहान गट), अकरावी ते पदवी (मध्यम गट) आणि सर्व महिलांसाठी खुला गट असे वर्गीकरण आहे. क्रिकेट व रस्सीखेच स्पर्धेत तिन्ही गटांसाठी प्रथम ११,१०० रुपये व ट्रॉफी, द्वितीय ७,००० रुपये व ट्रॉफी आणि तृतीय ५,००० रुपये व ट्रॉफी अशी आकर्षक बक्षिसे देण्यात येणार आहेत. तसेच बॅडमिंटन स्पर्धेतील विजेत्यांना रोख रक्कम व सन्मानचिन्ह देऊन गौरविण्यात येईल.
या क्रीडा महोत्सवाचा दिमाखदार उद्घाटन सोहळा ७ मार्च २०२६ रोजी राज्याचे माजी मंत्री बाळासाहेब थोरात, माजी आमदार डॉ. सुधीर तांबे, आमदार सत्यजित तांबे यांच्यासह कांचनताई थोरात, माजी नगराध्यक्ष दुर्गाताई तांबे, नगराध्यक्ष डॉ. मैथिलीताई तांबे आणि आयोजक डॉ. जयश्रीताई थोरात यांच्या उपस्थितीत पार पडणार आहे.
सध्या एकविरा फाउंडेशनच्या वतीने स्पर्धेची जय्यत तयारी सुरू असून, जास्तीत जास्त महिला व युवतींनी या उपक्रमात सहभाग नोंदवावा, असे आवाहन करण्यात आले आहे. नावनोंदणीसाठी इच्छुकांनी यशोधन कार्यालय किंवा ७०५७०३७०३७ या क्रमांकावर संपर्क साधण्याचे आवाहन डॉ. जयश्रीताई थोरात यांनी केले आहे.