हनुमंत पवार यांच्यावरील हल्ल्याचा राहुल गांधी समर्थक संघाकडून (RGSS) तीव्र निषेध; कारवाईची मागणी

संगमनेर, प्रतिनिधी – 

काँग्रेस प्रवक्ते हनुमंत पवार यांच्यावर पुण्यात झालेल्या भ्याड हल्ल्याचे पडसाद संगमनेरमध्ये उमटले आहेत. राहुल गांधी समर्थक संघ, महाराष्ट्र (TEAM RGSS) यांच्या वतीने संगमनेर शहर पोलीस निरीक्षकांना निवेदन देऊन या घटनेचा तीव्र निषेध करण्यात आला. पोलीस प्रशासनाने या प्रकरणी तातडीने पावले उचलून न्याय मिळवून द्यावा, अशी भावना यावेळी उपस्थित समर्थकांनी व्यक्त केली.

पुणे येथे तुषार दामगुडे नामक व्यक्तीने हनुमंत पवार यांच्यावर केलेल्या हल्ल्यामुळे राजकीय वर्तुळात मोठी खळबळ उडाली आहे. या निवेदनात म्हटले आहे की, लोकशाहीमध्ये अशा हिंसक घटनांना स्थान नसून हा हल्ला लोकशाही मूल्यांवर झालेला मोठा आघात आहे. राजकीय कार्यकर्त्यांच्या सुरक्षेचा प्रश्न या निमित्ताने ऐरणीवर आला असून पोलीस प्रशासनाने या प्रकरणातील मुख्य आरोपीसह सर्व दोषींना तात्काळ अटक करावी अशी मागणी करण्यात आली आहे. 

तसेच या संपूर्ण प्रकरणाची निष्पक्ष चौकशी करून दोषींवर कठोर कायदेशीर कारवाई करावी आणि भविष्यात राजकीय कार्यकर्त्यांच्या सुरक्षेसाठी ठोस उपाययोजना कराव्यात अशी अपेक्षाही समर्थकांनी व्यक्त केली आहे.

यावेळी निवेदन देताना राहुल गांधी समर्थक संघाचे अमोल शेलकर, राम अरगडे, प्रकाश कडलग, अरुण चव्हाण, डॉ. सचिन वाळे, सतीश खताळ, मनोज हासे, ॲड. अनिल गोडसे, रवींद्र हासे, प्रवीण हासे, शंतनू भालेकर आणि मोहसिन शेख आदी उपस्थित होते.