अहिल्यानगर ग्रंथोत्सव २०२५ चा प्रवरानगरमध्ये उत्साहात शुभारंभ

प्रवरानगर:
डिजिटल युगात तंत्रज्ञान कितीही बदलले तरी वाचन संस्कृती कधीच थांबणार नाही, उलट ती नव्या माध्यमांतून अधिक व्यापक होईल, असा विश्वास व्यक्त करत वाचन संस्कृतीला चालना देण्यासाठी ग्रंथोत्सवासारखे उपक्रम अत्यंत उपयुक्त असून समाजाने यात सक्रिय सहभाग घ्यावा, असे आवाहनही अहिल्या नगर जिल्हा परिषदेच्या माजी अध्यक्ष शालिनीताई विखे पाटील यांनी केले.
प्रवरानगर येथील खासदार बाळासाहेब विखे पाटील बहुउद्देशीय सभागृहात जिल्हा ग्रंथालय अधिकारी कार्यालयाच्या वतीने आयोजित ‘अहिल्यानगर ग्रंथोत्सव २०२५’ च्या उद्घाटनप्रसंगी त्या बोलत होत्या. कार्यक्रमाला प्रवरा अभिमत विद्यापीठाचे कुलगुरू डॉ. व्ही. एम. मगरे, प्रभारी ग्रंथालय संचालक अशोक गाडेकर, सरपंच कल्पना मैड, सहायक ग्रंथ संचालक सचिन जोपुळे, साहित्यिक जयंत येलूलकर, प्रा. गणेश भगत, चंद्रकांत पालवे, प्रवरा ग्रामीण शिक्षण संस्थेच्या संचालिका लिलावती सरोदे, प्राचार्य राम पवार यांच्यासह अनेक मान्यवर उपस्थित होते.
आपल्या भाषणात शालिनीताई विखे यांनी जिल्ह्याला लाभलेली संत ज्ञानेश्वर, महिपती महाराज आणि निळोबारायांची समृद्ध आध्यात्मिक व साहित्यिक परंपरा जतन करणे ही आपली जबाबदारी असल्याचे नमूद केले. तसेच पालकमंत्री डॉ. राधाकृष्ण विखे पाटील यांच्या पुढाकाराने जिल्ह्यातील ग्रंथालयांना मिळालेले कोट्यवधींचे अनुदान आणि राहता व पाथर्डी येथे उभारल्या जाणाऱ्या डिजिटल उपकेंद्रांची माहिती त्यांनी दिली.
कुलगुरू डॉ. व्ही. एम. मगरे यांनी बदलत्या काळात पारंपरिक ग्रंथालयांसोबतच डिजिटल माध्यमांचा प्रभावी वापर करण्यावर भर दिला. प्रास्ताविकात अशोक गाडेकर यांनी ग्रामीण भागातील वाचकांना दर्जेदार साहित्य उपलब्ध करून देणे हा या ग्रंथोत्सवाचा मुख्य उद्देश असल्याचे सांगितले. या महोत्सवाचे आकर्षण ठरलेली ग्रंथदिंडी आणि विविध प्रकाशनांच्या पुस्तक प्रदर्शनाला विद्यार्थी व नागरिकांनी मोठा प्रतिसाद दिला. कार्यक्रमादरम्यान उत्कृष्ट वाचनालयांचा आणि ग्रंथवाचकांचा गौरव करण्यात आला.