गांजा प्रकरणाला नवे वळण; आरोपी परवेझ शेखच्या जामीनासंदर्भात न्यायालयाचा हा निर्णय

संगमनेर, प्रतिनिधी – 
शहर परिसरात गेल्या वर्षी डिसेंबर महिन्यात ३२ किलो ८४५ ग्रॅम गांजा जप्त करून खळबळ उडवून देणाऱ्या पोलीस कारवाईला आता कायदेशीर प्रक्रियेत एक महत्त्वाचे वळण मिळाले आहे. या गुन्ह्यातील मुख्य आरोपींपैकी एक असलेल्या परवेझ दाऊद शेख याला संगमनेरच्या विशेष न्यायालयाने जामीन मंजूर केला आहे.
या प्रकरणाची पार्श्वभूमी अशी की, ११ डिसेंबर २०२५ रोजी मध्यरात्री संगमनेर शहर पोलिसांनी ‘गोल्डन सिटी’ परिसरात गुप्त माहितीच्या आधारे मोठी छापेमारी केली होती. या कारवाईदरम्यान पोलिसांनी घटनास्थळावरून सुमारे ३२ किलो ८४५ ग्रॅम वजनाचा गांजा जप्त केला होता. या मोठ्या साठ्यामुळे शहरात मोठी खळबळ उडाली होती आणि पोलिसांनी याप्रकरणी अंमली पदार्थ विरोधी कायद्यांतर्गत (NDPS Act) कलम ८(क), २०(ब), आणि २२(ब) नुसार गुन्हा दाखल करून एकूण चार आरोपींना अटक केली होती.
या गुन्ह्यातील संशयित आरोपी परवेझ दाऊद शेख याच्या वतीने विधीज्ञ ॲड. शोण दिपक थोरात यांनी न्यायालयात जामिनासाठी अर्ज दाखल केला होता. अर्जावरील सुनावणी दरम्यान ॲड. थोरात यांनी तपास यंत्रणेच्या तपासातील गंभीर त्रुटींकडे न्यायालयाचे लक्ष वेधले.
एन.डी.पी.एस. कायद्यासारख्या कठोर कायद्याची अंमलबजावणी करताना ज्या कायदेशीर तरतुदींचे आणि प्रक्रियेचे पालन करणे तपास अधिकाऱ्यांवर बंधनकारक असते, त्याचे या प्रकरणात उल्लंघन झाल्याचा दावा बचाव पक्षाने केला. तसेच, या गुन्ह्यात आरोपीचा प्रत्यक्ष सहभाग असल्याचे सिद्ध करण्यासाठी ठोस पुरावे नसल्याचेही पुराव्यानिशी मांडण्यात आले.
दोन्ही बाजूंचा युक्तिवाद आणि सादर केलेली कागदपत्रे पडताळून पाहिल्यानंतर, अतिरिक्त सत्र न्यायाधीश मंदार नेरलेकर यांच्या न्यायालयाने परवेझ दाऊद शेख याचा या गुन्ह्यातील प्रथमदर्शनी सहभाग साशंक असल्याचे महत्त्वपूर्ण निरीक्षण नोंदवत न्यायालयाने शेख याचा जामीन अर्ज मंजूर केला. या कायदेशीर लढाईत ॲड. शोण थोरात यांना ॲड. प्रमोद शिंदे आणि ॲड. आकाश जाधव यांनी सहकार्य केले.
संगमनेर शहरात गेल्या काही काळापासून अंमली पदार्थांच्या विक्रीच्या संदर्भात अनेक गुन्हे दाखल झाले असून पोलीस प्रशासन कडक पावले उचलत आहे. अशा परिस्थितीत, इतक्या मोठ्या प्रमाणात गांजा सापडलेल्या प्रकरणातील एका आरोपीला जामीन मिळाल्याने कायदेशीर आणि सामाजिक वर्तुळात मोठी चर्चा रंगली आहे. आता या प्रकरणातील इतर आरोपींच्या भवितव्याबाबत आणि पुढील न्यायालयीन प्रक्रियेकडे संपूर्ण शहराचे लक्ष लागले आहे.