नाशिक-पुणे महामार्गावर गुटख्याची मोठी तस्करी उघड; १२ लाखांच्या स्कॉर्पिओसह सुमारे १९ लाखांचा मुद्देमाल जप्त

संगमनेर, प्रतिनिधी –

संगमनेर तालुका पोलिसांनी नाशिक-पुणे महामार्गावरील कऱ्हे घाट परिसरात मोठी कारवाई करत गुटखा आणि सुगंधी तंबाखूची अवैध वाहतूक उघडकीस आणली आहे. या कारवाईत पोलिसांनी सुमारे १९ लाख २० हजार रुपये किमतीचा मुद्देमाल हस्तगत केला असून तीन जणांविरुद्ध गुन्हा दाखल केला आहे.

मिळालेल्या माहितीनुसार, २ मार्च २०२६ रोजी पहाटे साडेपाच वाजेच्या सुमारास संगमनेर तालुका पोलीस स्टेशनचे अंमलदार गस्त घालत असताना त्यांना एका पांढऱ्या रंगाच्या महिंद्रा स्कॉर्पिओ गाडीचा (क्रमांक एम.एच. ४६ एक्स. ४०४६) संशय आला. पोलिसांनी या वाहनाची झडती घेतली असता, त्यामध्ये विक्रीच्या उद्देशाने साठवून ठेवलेला मोठा साठा मिळून आला. यामध्ये ६ लाख ५३ हजार ४०० रुपये किमतीचा विमल पान मसाला आणि ६६ हजार ६०० रुपये किमतीची सुगंधी तंबाखू असा एकूण ७ लाख २० हजार रुपयांचा प्रतिबंधित माल आढळून आला. पोलिसांनी गुन्ह्यात वापरलेली १२ लाख रुपये किमतीची स्कॉर्पिओ गाडीही जप्त केली आहे.

या प्रकरणी पोलीस हवालदार अमित महाजन यांनी दिलेल्या फिर्यादीवरून शाम कोंडीभाऊ काळे (रा. रणखांबफाटा, संगमनेर), युसुफ चौगुले (रा. घारगाव, संगमनेर) आणि सिल्वासा येथील शक्ती ट्रेडर्सचा मालक धिरज माळी यांच्या विरोधात गुन्हा रजिस्टर नंबर ९४/२०२६ नुसार बी.एन.एस. कलम १२३, २७४, २७५, २२३ अन्वये गुन्हा दाखल करण्यात आला आहे. यातील आरोपी शाम काळे हा स्वतः वाहन चालवत होता, तर युसुफ चौगुले याच्या सांगण्यावरून सिल्वासा येथून हा माल आणला जात असल्याचे प्राथमिक तपासात समोर आले आहे.

संगमनेर तालुका पोलीस स्टेशनचे पोलीस निरीक्षक प्रवीण साळुंखे यांच्या मार्गदर्शनाखाली पोलीस उपनिरीक्षक महेश शिंदे या प्रकरणाचा पुढील तपास करत आहेत. महामार्गावर पहाटेच्या सुमारास झालेल्या या धाडसी कारवाईमुळे अवैध गुटखा तस्करांचे धाबे दणाणले आहेत.