भाजपकडून राज्यसभा निवडणुकीसाठी महाराष्ट्रातील या चार उमेदवारांची घोषणा

नवी दिल्ली:
भारतीय जनता पार्टीच्या केंद्रीय निवडणूक समितीने महाराष्ट्रातील आगामी राज्यसभा द्विवार्षिक निवडणुकीसाठी आपल्या चार अधिकृत उमेदवारांच्या नावांची घोषणा केली आहे. या संदर्भात पक्षाच्या केंद्रीय कार्यालयाकडून अधिकृत प्रसिद्धी पत्रक जारी करण्यात आले असून, यामध्ये अनुभवी नेत्यांसह नव्या चेहऱ्यांना संधी देण्यात आली आहे. महाविकास आघाडीकडून अद्याप उमेदवाराची घोषणा करण्यात आली नसल्याने आघाडीतील पेच अद्यापही कायम आहे. महाविकास आघाडीकडून कोणाच्या नावाची घोषणा केली जाते याची उत्सुकता लागली आहे.
भाजप कडून जाहीर करण्यात आलेल्या यादीनुसार, महायुतीमधील महत्त्वाचे घटक पक्ष असलेले रिपब्लिकन पार्टी ऑफ इंडिया (ए) चे प्रमुख आणि केंद्रीय मंत्री रामदास आठवले यांना पुन्हा एकदा उमेदवारी देण्यात आली आहे. त्यांच्यासोबतच भाजपचे राष्ट्रीय सरचिटणीस विनोद तावडे यांनाही राज्यसभेच्या रिंगणात उतरवण्यात आले आहे.
महिला प्रतिनिधी म्हणून श्रीमती माया चिंतामण ईवनाते यांना संधी देण्यात आली असून, रामराव वडकुते यांच्या नावावरही पक्षाने शिक्कामोर्तब केले आहे.
पक्षाचे राष्ट्रीय सरचिटणीस अरुण सिंह यांच्या स्वाक्षरीने हे पत्रक प्रसिद्ध करण्यात आले असून, आगामी निवडणुकांच्या पार्श्वभूमीवर भाजपने या नावांच्या माध्यमातून विविध समीकरणे साधण्याचा प्रयत्न केल्याचे दिसून येत आहे.