संगमनेरमध्ये शिवजन्मोत्सवाचा अभूतपूर्व उत्साह; पारंपारिक मिरवणुकीतून दिसले एकतेचे दर्शन!

संगमनेर:
छत्रपती शिवाजी महाराज यांच्या जन्मोत्सवानिमित्त काल संगमनेर शहरात निघालेली ऐतिहासिक पारंपारिक मिरवणूक म्हणजे केवळ एक सोहळा नव्हता, तर ते संगमनेरकरांच्या अखंडतेचे आणि अलोट प्रेमाचे दर्शन ठरले, असे शिवसेनेचे उपजिल्हाप्रमुख अमर कतारी, शहर प्रमुख अमित चव्हाण यांनी म्हटले आहे.
या ऐतिहासिक मिरवणुकीच्या आरतीचे मानकरी माजी महसूल मंत्री बाळासाहेब थोरात साहेब हे ठरले. त्यांच्यासोबत शिवसेना जिल्हाप्रमुख सचिन कोते पाटील, कोपरगाव तालुका प्रमुख भरत मोरे, शिवजयंती उत्सव युवक समितीचे अध्यक्ष, उपाध्यक्ष व सर्व पदाधिकारी, शिवज्योत प्रतिष्ठानचे अध्यक्ष व सर्व सदस्य, तसेच शिवसेना महिला आघाडी आणि तमाम सर्वपक्षीय शिवभक्त मोठ्या संख्येने उपस्थित होते
कतारी-चव्हाण म्हणाले, शिवसेना (उद्धव बाळासाहेब ठाकरे) पक्ष आणि शिवजयंती उत्सव युवक समितीच्या वतीने आयोजित या भव्य मिरवणुकीत प्रत्येक संगमनेरकर ज्या उत्साहाने सहभागी झाला, त्यातून शहराच्या एकतेचा एक नवा आणि आदर्श वस्तुपाठ घालून दिला गेला आहे.
या अभूतपूर्व सोहळ्याचे वैशिष्ट्य म्हणजे जात-पात आणि सर्व राजकीय भेदाभेद विसरून हजारो शिवभक्त या मिरवणुकीत खांद्याला खांदा लावून सहभागी झाले होते. ढोल-ताशांच्या गजरात आणि “जय भवानी, जय शिवाजी”च्या जयघोषात अवघे संगमनेर शहर शिवमय झाले होते.
मिरवणुकीदरम्यान संगमनेरकरांनी दाखवलेला शिस्तबद्ध सहभाग आणि अभूतपूर्व प्रतिसाद खरोखरच कौतुकास्पद ठरला. या यशस्वी आयोजनाबद्दल शिवसेना (उद्धव बाळासाहेब ठाकरे) पक्षाचे पदाधिकारी आणि उत्सव समितीने सर्व संगमनेरकरांचे मनापासून आभार मानले असून, शिवरायांवरील ही भक्ती आणि आपला हा एकोपा भविष्यातही असाच कायम राहो, अशी सदिच्छा व्यक्त केली आहे.
यावेळी उपजिल्हाप्रमुख अमर कतारी, शहरप्रमुख अमित चव्हाण, शिवजयंती उत्सव युवक समितीचे अध्यक्ष विनायक गरुडकर, तालुकाप्रमुख भाऊसाहेब हासे, शिवसेना उबाठा शिवजयंती उत्सव अध्यक्ष अमोल डुकरे, तसेच सर्व नगरसेवक, संगमनेर सेवा समितीचे पदाधिकारी आणि शिवसैनिकांनी उपस्थित राहून सर्व शिवभक्तांप्रती कृतज्ञता व्यक्त केली.