संगमनेर, प्रतिनिधी
“जय भवानी, जय शिवाजी… छत्रपती शिवाजी महाराज की जय!” या घोषणांनी संगमनेर शहर शनिवारी अक्षरशः दणाणून गेले. शिवसेना-भाजप महायुतीच्या वतीने आयोजित करण्यात आलेल्या भव्य मिरवणुकीने तब्बल सात तास शहरातील नागरिकांचे लक्ष वेधून घेतले. ऐतिहासिक देखावे, ढोल-ताशांचा कडकडाट, अघोरी नृत्य आणि विविध सांस्कृतिक सादरीकरणांमुळे संपूर्ण शहरात उत्सवाचे वातावरण निर्माण झाले होते. विशेषतः छत्रपती शिवाजी महाराजांचा भव्य अश्वारूढ पुतळा आणि अफजलखान वधाचा जिवंत देखावा हे या मिरवणुकीचे प्रमुख आकर्षण ठरले.
सायंकाळी पाच वाजण्याच्या सुमारास संगमनेर नगरपालिकेपासून मिरवणुकीला उत्साहात सुरुवात करण्यात झाली. यावेळी शिवचरित्रकार एस. झेड. देशमुख, नीलम खताळ, शिवसेनेचे शहराध्यक्ष विनोद सूर्यवंशी, भाजप शहराध्यक्ष पायल ताजणे, नगरसेविका साक्षी सूर्यवंशी यांच्यासह महायुतीचे पदाधिकारी आणि कार्यकर्ते उपस्थित होते.
नगरपालिकेपासून सुरू झालेली ही भव्य मिरवणूक लालबहादूर शास्त्री चौक, बाजारपेठ, तेली खुंट, सय्यद बाबा चौक, मेन रोड, चावडी, अशोक चौक या प्रमुख मार्गांवरून मार्गक्रमण करत छत्रपती शिवाजी महाराज स्मारक येथे पोहोचली. येथे आमदार अमोल खताळ यांच्या हस्ते महाराजांची महाआरती करण्यात आली. त्यानंतर बसस्थानक येथे या मिरवणुकीची सांगता झाली.
मिरवणुकीच्या संपूर्ण मार्गावर नागरिकांनी मोठ्या उत्साहात स्वागत केले. ठिकठिकाणी उभारलेल्या स्वागत कमानी, भगव्या पताका आणि आकर्षक फुलांची सजावट यामुळे शहर भगवेमय झाले होते.
या मिरवणुकीत शिवछत्रपती गौरव पालखी, अश्वदर्शन, हिंदू जनजागृती घोष पथक, दहा वर्षांच्या चिमुकल्यांनी सादर केलेले मर्दानी खेळ, एरियल योगा तसेच ‘आदि योगी महादेव’ यांचा देखावा यांचा समावेश होता. अफजलखान वधाचा जिवंत देखावा पाहण्यासाठी नागरिकांनी मोठी गर्दी केली होती. याशिवाय अघोरींचे नृत्यही उपस्थितांसाठी विशेष आकर्षण ठरले. मावळ येथील किंग स्टार ब्रास बँड पथक आणि एकलव्य ढोल-ताशा पथक यांच्या दमदार सादरीकरणाने संपूर्ण वातावरण भारावून गेले. ढोल-ताशांच्या कडकडाटात, जयघोषांच्या गजरात आणि भगव्या पताकांच्या साक्षीने निघालेल्या या भव्य मिरवणुकीने संगमनेर शहरात उत्साह आणि अभिमानाचे वातावरण निर्माण केले.
सेल्फींचा वर्षाव; अश्वारूढ पुतळ्याने वेधले लक्ष – संगमनेर शहरातील बसस्थानक परिसरात महायुतीच्या वतीने उभारण्यात आलेल्या छत्रपती शिवाजी महाराजांच्या अश्वारूढ पुतळ्याने नागरिकांचे विशेष लक्ष वेधून घेतले. मिरवणुकीदरम्यान हा पुतळा पाहण्यासाठी नागरिकांनी मोठी गर्दी केली होती. सुमारे दीड ते दोन लाख नागरिकांनी या ठिकाणी भेट देत पुतळ्यासोबत सेल्फी आणि छायाचित्रे काढण्याचा आनंद लुटला. तरुण-तरुणी, महिला, पुरुष तसेच ज्येष्ठ नागरिकांनीही उत्साहाने सहभाग नोंदवत पुतळ्याभोवती मोठी गर्दी केली होती. बसस्थानक परिसरात झालेल्या या प्रचंड गर्दीवरून संगमनेरकरांची पसंती छत्रपती शिवाजी महाराजांच्या अश्वारूढ पुतळ्यालाच असल्याचे स्पष्टपणे दिसून आले.
