संगमनेरच्या नर्सिंग कॉलेजला तातडीने मंजुरी देण्याची आमदार अमोल खताळ यांची मागणी

मुंबई, विशेष प्रतिनिधी – 
संगमनेरमध्ये प्रशिक्षित आरोग्य सेवकांचे जाळे निर्माण व्हावे, यासाठी प्रस्तावित नर्सिंग कॉलेजला तातडीने प्रशासकीय मंजुरी देण्याची विनंती करत हे महाविद्यालय सुरू झाल्यास स्थानिक तरुणांना रोजगाराच्या संधी मिळतील आणि आरोग्य व्यवस्थेला हक्काचे मनुष्यबळ उपलब्ध होईल, असा विश्वास आमदार अमोल खताळ यांनी व्यक्त केला.
सध्या सुरू असलेल्या अर्थसंकल्पीय अधिवेशनात संगमनेर मतदारसंघातील आरोग्य व्यवस्थेचा प्रश्न आमदार अमोल खताळ यांनी मांडला. मतदारसंघातील सरकारी रुग्णालयांमध्ये वैद्यकीय उपकरणांची कमतरता, औषधांचा अपुरा साठा आणि डॉक्टर तसेच आरोग्य कर्मचाऱ्यांच्या रिक्त असलेल्या जागांमुळे सर्वसामान्यांना उपचारांसाठी मोठी कसरत करावी लागत असल्याकडे त्यांनी सभागृहाचे लक्ष वेधले.
संगमनेरचा विस्तार पाहता स्थानिक पातळीवर सक्षम आरोग्य सुविधा नसल्याने गंभीर रुग्णांना उपचारांसाठी दूरच्या शहरांकडे धाव घ्यावी लागते, ही बाब त्यांनी अत्यंत चिंताजनक असल्याचे नमूद केले. रुग्णालयांचे सक्षमीकरण करतानाच औषधांची गुणवत्ता आणि त्यांच्या किमतींवर शासनाने कडक नियंत्रण ठेवावे, अशी आग्रही मागणी त्यांनी यावेळी केली. याचसोबत संगमनेरमधील नागरिकांना वेळेवर आणि दर्जेदार आरोग्य सेवा मिळाव्यात यासाठी सरकारने तातडीने ठोस पावले उचलावीत, असे आवाहन आमदार खताळ यांनी यावेळी केले.