संगमनेर, प्रतिनिधी-
संगमनेर तालुक्यातील वडगाव पान येथे काल एका अल्पवयीन मुलीवर ॲसिडसदृश पदार्थाने हल्ला झाल्याची धक्कादायक घटना घडली होती. अद्याप आरोपींचा पत्ता लागलेला नसला तरी दहा पोलीस पथके विविध ठिकाणी रवाना झाली असून लवकरच आरोपींना अटक करण्यात येईल, असा विश्वास प्रशासनाने व्यक्त केला आहे.
याप्रकरणी संगमनेर तालुका पोलीस ठाण्यात पीडित मुलीच्या आईने दिलेल्या फिर्यादीवरून गुन्हा रजिस्टर क्रमांक १२६/२०२६ नुसार भारतीय न्याय संहिता (BNS) कलम १२४(१) आणि १२६(२) अन्वये गुन्हा दाखल करण्यात आला आहे. घटनेचे गांभीर्य ओळखून पोलीस प्रशासनाने तपासाची चक्रे वेगाने फिरवली असून आरोपींच्या मुसक्या आवळण्यासाठी तब्बल दहा पथके तैनात करण्यात आली आहेत.
या गुन्ह्याचा तपास करण्यासाठी स्थानिक पोलिसांसह सायबर टीम आणि फॉरेन्सिक तज्ज्ञांची मदत घेतली जात आहे. गोपनीय माहिती, तांत्रिक विश्लेषण आणि पीडितेने दिलेल्या वर्णनानुसार पोलीस सर्व बाजूंनी सखोल तपास करत आहेत.
वैद्यकीय अहवालानुसार, पीडित मुलगी या हल्ल्यात ४ ते ५ टक्के भाजली असून तिच्यावर लोणी येथील प्रवरा ग्रामीण रुग्णालयात (PMT) उपचार सुरू आहेत. तज्ज्ञ जनरल फिजिशियन, नेत्ररोग तज्ज्ञ आणि प्लास्टिक सर्जन यांच्या मार्गदर्शनाखाली तिच्यावर उपचार केले जात आहेत. सध्या पीडित मुलीची प्रकृती स्थिर असल्याचे डॉक्टरांनी म्हटले आहे.
अप्पर पोलीस अधीक्षक सोमनाथ वाघचौरे यांनी या प्रकरणाचा तपास सुरू असल्याचे सांगत, या घटनेबाबत किंवा संशयित आरोपीबाबत नागरिकांना काहीही माहिती मिळाल्यास तातडीने पोलीस प्रशासनाशी संपर्क साधण्याचे आवाहन केले आहे.
वडगाव पान येथील पीडित मुलीची प्रकृती स्थिर; आरोपींच्या शोधासाठी पोलिसांची दहा पथके रवाना
अप्पर पोलीस अधीक्षक सोमनाथ वाघचौरे यांनी या प्रकरणाचा तपास सुरू असल्याचे सांगत, या घटनेबाबत किंवा संशयित आरोपीबाबत नागरिकांना काहीही माहिती मिळाल्यास तातडीने पोलीस प्रशासनाशी संपर्क साधण्याचे आवाहन केले आहे.
