महाराष्ट्र संवाद न्यूज ऑनलाईन, संगमनेर
संगमनेर येथील डॉ. सोनांबेकर हॉस्पिटलमध्ये उपचारादरम्यान झालेल्या हलगर्जीपणामुळे आपल्या पत्नीचा मृत्यू झाल्याचा गंभीर आरोप एका पीडित पतीने केला आहे. यामुळे आधीच एका प्रकरणात गुन्हा दाखल झालेल्या डॉक्टरांच्या अडचणीमध्ये वाढ झाली आहे.
रोहीदास गणपत डोंगरे (रा. निमज, ता. संगमनेर) यांनी संगमनेर शहर पोलीस स्टेशनसह जिल्हा सिव्हिल हॉस्पिटल आणि महाराष्ट्र मेडिकल कौन्सिलकडे लेखी तक्रार दाखल करून सखोल चौकशीची मागणी केली आहे. याप्रकरणी होणाऱ्या पुढील कारवाईकडे लक्ष लागले आहे.
तक्रारदार डोंगरे यांनी दिलेल्या केलेल्या तक्रारीनुसार, त्यांची पत्नी मिना डोंगरे यांना छातीचा त्रास होत असल्याने २८ जानेवारी २०२६ रोजी डॉ. सोनांबेकर हॉस्पिटलमध्ये दाखल करण्यात आले होते. तेथे डॉ. कोरडे यांच्या देखरेखीखाली त्यांच्यावर उपचार सुरू होते. दाखल केल्याच्या दिवशीच त्यांची एन्जिओग्राफी करण्यात आली आणि त्यानंतर २४ तासांच्या आत ८० टक्के ब्लॉक असल्याचे सांगून त्यांची एन्जिओप्लास्टी करण्यात आली.
मात्र, एन्जिओप्लास्टीनंतर रुग्णाची प्रकृती सुधारण्याऐवजी खालावत गेली. या काळात रुग्णाला सतत चक्कर येत होती आणि उलट्यांचा त्रास होत होता, तरीही डॉक्टरांनी त्याकडे दुर्लक्ष केल्याचा आरोप तक्रारीत करण्यात आला आहे.
हॉस्पिटलमधील नियोजनावर ताशेरे ओढताना डोंगरे यांनी नमूद केले की, ३० जानेवारी रोजी सकाळी डॉक्टरांनी एम.आर.आय. करण्याची सूचना दिली होती. मात्र दुपारपर्यंत हॉस्पिटल प्रशासनाने त्याबाबत कोणतीही हालचाल केली नाही. नातेवाईकांनी चौकशी केली असता संगमनेरमधील दुसऱ्या हॉस्पिटलमध्ये गर्दी असल्याचे सांगून वेळ मारून नेण्यात आली.
अखेर नातेवाईकांनी स्वतः बाहेरून रुग्णवाहिका बोलावून एम.आर.आय. केला. या विलंबामुळे रुग्णाची अवस्था अधिकच गंभीर झाली. तसेच आयसीयूमध्ये असताना युरिन कॅथेटर निखळल्याने बेड ओला झाला होता आणि रुग्णाला उलट्या झाल्या असतानाही स्टाफने स्वच्छता केली नाही, असा संतापजनक अनुभवही नातेवाईकांनी मांडला आहे.
रुग्णाची प्रकृती चिंताजनक झाल्यानंतर ३० जानेवारी रोजी सायंकाळी डॉक्टरांनी त्यांना नाशिक येथील सोपान हॉस्पिटलमध्ये हलवण्यास सांगितले. तेथे नेल्यानंतर करण्यात आलेल्या चाचण्यांमध्ये रुग्णाला न्यूमोनियाची लागण झाल्याचे निष्पन्न झाले. सोनांबेकर हॉस्पिटलमध्ये न्यूमोनियाकडे दुर्लक्ष करून इतरच उपचार करण्यात आले, असा दावा डोंगरे यांनी केला आहे. दुर्दैवाने उपचारादरम्यान ८ फेब्रुवारी २०२६ रोजी मिना डोंगरे यांचा मृत्यू झाला.
या सर्व प्रकरणाची गांभीर्याने दखल घेऊन दोषींवर कारवाई करावी, अशी मागणी रोहीदास डोंगरे यांनी केली आहे. त्यांनी हॉस्पिटलमधील त्या काळातील सीसीटीव्ही फुटेज जतन करण्याची आणि उपचाराशी संबंधित सर्व कागदपत्रे उपलब्ध करून देण्याची विनंती पोलिसांना केली आहे.
या घटनेमुळे संगमनेरमधील वैद्यकीय क्षेत्रात मोठी खळबळ उडाली असून पोलीस आणि संबंधित आरोग्य विभाग या तक्रारीवर काय पाऊल उचलतात याकडे सर्वांचे लक्ष लागले आहे.
