महाराष्ट्र संवाद न्यूज, संगमनेर:
अखिल भारतीय मराठी बालकुमार साहित्य संस्थेच्या संगमनेर शाखेच्यावतीने रविवारी (१० मे) शहरात एका विशेष विनामूल्य कथाकथन कार्यशाळेचे आयोजन करण्यात आले असल्याची माहिती संस्थेचे अध्यक्ष अनिल देशपांडे यांनी दिली आहे.
सह्याद्री महाविद्यालयातील के.बी. दादा देशमुख सभागृहात सकाळी १० ते दुपारी ४ या वेळेत ही कार्यशाळा होणार असून या उपक्रमाच्या माध्यमातून संगमनेरकर नागरिक, शिक्षक आणि विद्यार्थ्यांना कथाकथन क्षेत्रातील बारकावे शिकण्याची सुवर्णसंधी उपलब्ध झाली आहे.
या कार्यशाळेत पुणे येथील अखिल भारतीय सानेगुरुजी कथामाला संचलित सानेगुरुजी कथाकथन प्रबोधिनी संस्थेचे अध्यक्ष शामराव कराळे, अपर्णा निरगुडे आणि रमेशराव काळे हे अनुभवी मार्गदर्शक उपस्थित राहणार आहेत. या प्रशिक्षणादरम्यान उत्कृष्ट कथा निवेदक कसा तयार करावा, कथाकथनाचे तंत्र-मंत्र, कथेची व्याप्ती, विविध प्रकार आणि संस्कारांसाठी कथेचा वापर यांसारख्या वैविध्यपूर्ण विषयांवर सखोल मार्गदर्शन केले जाणार आहे.
ही कार्यशाळा सर्व इच्छुक महिला, पुरुष, पालक, शिक्षक तसेच डी.एड. आणि बी.एड.च्या विद्यार्थ्यांसाठी पूर्णपणे मोफत व खुली ठेवण्यात आली आहे. या महत्त्वपूर्ण उपक्रमाला माजी नगराध्यक्ष दुर्गाताई तांबे आणि संस्थेचे संस्थापक अध्यक्ष डॉ. संजय मालपाणी यांची प्रमुख उपस्थिती लाभणार आहे.
कार्यशाळेसाठी नावनोंदणी प्रक्रिया सुरू झाली असून इच्छुकांनी सचिव दर्शन जोशी (७९७२८४९४३५) किंवा अध्यक्ष अनिल देशपांडे (८९८३७७१२५७) यांच्याशी संपर्क साधण्याचे आवाहन करण्यात आले आहे.
सहभागी होणाऱ्या प्रशिक्षणार्थींनी सोबत स्वतःचा जेवणाचा डबा, पाण्याची बाटली, वही आणि पेन आणणे आवश्यक आहे. या कार्यशाळेसाठी प्रवेश संख्या मर्यादित असल्याने इच्छुकांनी त्वरित आपली नोंदणी करावी, असे आवाहन उपाध्यक्ष डॉ. विवेक वाकचौरे, कार्याध्यक्ष अरविंद गाडेकर, कोषाध्यक्ष अरुण लेले, सहसचिव चारुदत्त काटकर तसेच सदस्य शशांक गंधे, प्रकाश पारखे, अनिल सोमणी आणि ओंकारनाथ बिहाणी यांनी केले आहे.
