‘सत्तेची हवा’ जोरात; संगमनेरात गोदा-नर्मदा जलयात्रेत भाजप पदाधिकाऱ्यांची पोलिसांशी हुज्जत

महाराष्ट्र संवाद न्यूज ऑनलाईन, संगमनेर: 

पुण्यश्लोक अहिल्यादेवी होळकर यांच्या त्रिशताब्दी जन्मोत्सवानिमित्त आयोजित गोदा ते नर्मदा जलयात्रा शनिवारी रात्री संगमनेरमध्ये दाखल झाली असताना, एका दुर्दैवी प्रकाराने या जलयात्रेला गालबोट लागले आहे. भाजपच्या काही युवा पदाधिकाऱ्यांनी सत्तेच्या धुंदीत वरिष्ठ पोलीस अधिकाऱ्यांसमोरच महिला पोलीस कर्मचारी आणि बंदोबस्तावरील कर्मचाऱ्यांशी अरेरावी करत त्यांच्या कर्तव्यात अडथळा आणल्याची धक्कादायक घटना समोर आली आहे.

मुख्यमंत्री देवेंद्र फडणवीस यांच्या हस्ते व राज्याचे जलसंपदा तथा अहिल्या नगर जिल्ह्याचे पालकमंत्री राधाकृष्ण विखे पाटील यांनी संपत्ती जलपूजा केल्यानंतर त्र्यंबकेश्वर येथून प्रारंभ झालेली ही जलयात्रा शनिवारी रात्री संगमनेरमधील प्रवरा नदीकाठच्या जाजू इंग्लिश मीडियम स्कूलच्या पटांगणात विसावली होती. राज्याचे जलसंपदा मंत्री तथा जिल्ह्याचे पालकमंत्री राधाकृष्ण विखे पाटील यांच्या पुढाकाराने आयोजित या दिंडीच्या स्वागतासाठी मोठी गर्दी झाली होती. सुरक्षिततेच्या कारणास्तव आणि शिस्त राखण्यासाठी पोलिसांनी शाळेच्या मुख्य प्रवेशद्वारावर कडक बंदोबस्त तैनात केला होता. वरिष्ठ अधिकाऱ्यांच्या सूचनेनुसार केवळ निमंत्रित आणि व्हीआयपी वाहनांनाच आत सोडले जात होते.

मात्र, याच दरम्यान पिवळ्या रंगाच्या वेस्पा स्कुटरवरून (क्रमांक MH-17-AT-1919) तीन युवक ट्रिपल सीट येत गेटमधून आत शिरण्याचा प्रयत्न करू लागले. कर्तव्यावर असलेल्या पोलीस अंमलदारांनी त्यांना अडवून दुचाकी बाहेर लावण्याची विनंती केली. मात्र, विनंती ऐकून घेण्याऐवजी दुचाकी चालक रोहित राजेश चौधरी आणि त्याच्यासोबत असलेला वरद प्रमोद बागुल यांनी पोलिसांशी उद्धट भाषेत वाद घालण्यास सुरुवात केली. तर तिसऱ्या व्यक्तीचे नाव समजू शकले नाही.

आपण युवा मोर्चाचे अध्यक्ष असल्याचे सांगत त्यांनी पोलिसांवर दबाव टाकण्याचा प्रयत्न केला. इतकेच नव्हे तर, पोलिसांनी वारंवार समजावून सांगूनही या युवकांनी पोलिसांच्या अंगावर गाडी घालण्याचा प्रयत्न केला आणि अश्लील भाषेत शिवीगाळ करत गेटच्या विरुद्ध बाजूला अनधिकृतपणे वाहन पार्क करून आत प्रवेश केला.

विशेष म्हणजे, हा सर्व प्रकार संगमनेरचे उपविभागीय पोलीस अधिकारी डॉ. कुणाल सोनवणे आणि पोलीस निरीक्षक समीर बारवकर यांच्या उपस्थितीत घडल्याने पोलिसांच्या शिस्तीवरच प्रश्नचिन्ह उभे राहिले आहे. शासकीय कामात अडथळा आणल्याप्रकरणी वरिष्ठ अधिकाऱ्यांच्या आदेशानुसार पोलिसांनी संबंधित दुचाकी ताब्यात घेऊन तिची चावी जमा केली होती. परंतु, कार्यक्रम संपल्यानंतर हँडल लॉक नसलेली ही दुचाकी संबंधित युवकांनी तेथून लोटत नेल्याचा दावा करण्यात येत आहे, तर दुचाकीची चावी शहर पोलीस ठाण्यात जमा असल्याचे समजते. पोलीस याप्रकरणी कारवाई करण्याची शक्यता आहे.

या पदाधिकाऱ्यांच्या वर्तणुकीमुळे घटनास्थळी काही काळ तणावाचे वातावरण निर्माण झाले होते. मात्र बंदोबस्तावरील कर्मचाऱ्यांनी कडक भूमिका घेतली होती. महिला पोलीस कर्मचाऱ्यांशी केलेल्या गैरवर्तनामुळे नागरिकांमध्ये संताप व्यक्त होत आहे. आता या प्रकरणी पोलीस प्रशासन संबंधित पदाधिकाऱ्यांवर कठोर कायदेशीर कारवाई करणार की राजकीय दबावापोटी या प्रकरणावर पडदा टाकला जाणार, याकडे संपूर्ण संगमनेर तालुक्याचे लक्ष लागले आहे.