बारामती:
बारामती विधानसभा पोटनिवडणुकीत राज्याच्या उपमुख्यमंत्री सुनेत्रा पवार यांनी २ लाख १४ हजार ९३ मतांच्या विक्रमी मताधिक्याने ऐतिहासिक विजय संपादन केला आहे. या निवडणुकीत त्यांना एकूण २ लाख १८ हजार ९३० मते मिळाली, तर त्यांच्या विरोधात उभ्या असलेल्या २२ उमेदवारांसह ‘नोटा’ला केवळ ४८३७ मतांवर समाधान मानावे लागले.
दिवंगत उपमुख्यमंत्री अजित पवार यांनी २०१९ च्या निवडणुकीत प्रस्थापित केलेला १ लाख ६५ हजार २६५ मताधिक्याचा विक्रम सुनेत्रा पवार यांनी मोडीत काढला आहे. अजित पवार यांच्या निधनानंतर ही जागा रिक्त झाली होती. ही निवडणूक बिनविरोध व्हावी यासाठी प्रयत्न करण्यात आले होते, मात्र २२ अपक्ष उमेदवारांनी माघार न घेतल्याने मतदान प्रक्रिया पार पडली.
मतदानाच्या दिवशी मतदारांमध्ये काहीसा निरुत्साह दिसून आला होता, सुमारे ५८.२७ टक्के मतदान झाले. बारामतीतील एमआयडीसी भागात पार पडलेल्या मतमोजणीत पहिल्या फेरीपासूनच सुनेत्रा पवार यांनी आपली आघाडी कायम ठेवली होती. टपाली मतपत्रिकांपासून सुरू झालेली ही आघाडी प्रत्येक फेरीगणिक वाढत गेली आणि २४ व्या फेरीअखेर त्यांच्या विजयावर शिक्कामोर्तब झाले.
या निवडणुकीत प्रमुख राजकीय पक्षांचे उमेदवार रिंगणात नव्हते, परंतु करुणा मुंडे आणि अभिजित बिचुकले यांच्यासह अनेक अपक्ष उमेदवारांना मतदारांनी पूर्णपणे नाकारल्याचे निकालावरून स्पष्ट झाले आहे.
विजयानंतर सुनेत्रा पवार यांनी अत्यंत संयमी भूमिका मांडत हा विजय दिवंगत अजित पवार यांच्या स्मृतींना समर्पित केला. निकाल जाहीर होताना त्यांनी कार्यकर्त्यांना विजयाचा जल्लोष न करण्याचे, मिरवणुका न काढण्याचे आणि गुलाल न उधळण्याचे भावनिक आवाहन केले. दादांच्या आठवणींमुळे सर्वजण भावूक असल्याचे नमूद करत, त्यांच्या विचारांना साजेसे वर्तन राखण्याचे आवाहन त्यांनी यावेळी केले. बारामतीकरांनी दाखवलेला हा विश्वास अजितदादांच्या कार्याप्रती असलेली श्रद्धा असल्याचेही त्यांनी आपल्या प्रतिक्रियेत म्हटले आहे.
