व्हाट्सअपवर ग्रुपवर राहुल गांधींना ‘वाबराचे वंशज’ संबोधणाऱ्या श्याम तिवारींवर गुन्हा

महाराष्ट्र संवाद न्यूज ऑनलाईन, संगमनेर:

‘सौ शहरी एक संगमनेर’ या व्हाट्सअप ग्रुपवर काँग्रेसचे नेते व लोकसभेतील विरोधी पक्ष नेते खासदार राहुल गांधी यांच्या बद्दल आक्षेपार्ह टिप्पणी करून त्यांची बदनामी केल्याप्रकरणी संगमनेर मधील श्याम तिवारी यांच्यावर संगमनेर शहर पोलीस ठाण्यात गुन्हा दाखल करण्यात आला आहे.

अभिव्यक्ती स्वातंत्र्याच्या नावाखाली सध्या संगमनेर मधील बहुतांशी व्हाट्सअप ग्रुप, समाज माध्यमांवर कोणाबद्दलही आक्षेपार्ह भाषेत टीकाटिप्पणी करून सामाजिक वातावरण दूषित करण्याचे प्रकार सुरू आहे. गेल्या काही दिवसात समाज माध्यमांवर केलेल्या अशा प्रकारच्या टीका टिपणीमुळे संगमनेर शहर पोलीस ठाण्यात आत्तापर्यंत मोठ्या प्रमाणात गुन्हे दाखल करण्यात आले आहे.

गेल्या काही दिवसापासून समाज माध्यमातून टीकाटिप्पणी आक्षेपार्ह स्वरूपात होत असल्याने अशा ग्रुपकडे पोलिसांनी सतर्कतेने बघण्याची आवश्यकता निर्माण झाली आहे. विशेष म्हणजे यातील काही व्हाट्सअप ग्रुप वर पोलीस अधिकारी देखील आहे. दोन दिवसांपूर्वी जागो संगमनेर या व्हाट्सअप ग्रुपच्या सदस्य आणि एडमिनवर शहर पोलिसांनी गुन्हा दाखल करून काही तास उलटत नाही तोच व्यावसायिक व सामाजिक कार्यकर्ते असलेल्या प्रकाश कडलग यांनी संगमनेर शहर पोलीस ठाण्यात दाखल केलेला गुन्हा चर्चेत आला आहे.

कडलग यांनी आपल्या फिर्यादीमध्ये म्हटले आहे की, त्यांच्या व्हाट्सअप ग्रुप मध्ये ‘सौ शहरी एक संगमनेरी’ नावाचा व्हाट्सअप ग्रुप असून संजय क्षत्रिय त्या ग्रुपचे ॲडमिन आहेत. १४ मार्च २०२६ रोजी सकाळी ते घरी असताना या ग्रुपवर अजित मणियार यांनी टाकलेल्या पोस्टला श्याम तिवारी (रा. देवाचा मळा) यांनी राहुल गांधी यांच्याबाबत आक्षेपार्ह भाषेत टीकाटिप्पणी करून ‘राहुल गांधी हे बाबराचे वंशज आहे’, असा बदनामीकारक उल्लेख करून त्यांची बदनामी केली.

या तक्रारीच्या आधारे संगमनेर शहर पोलीस ठाण्यात रजिस्टर नंबर ५००/२०२६ बी एम एस कलम ३५६(२) नुसार व अदखलपात्र गुन्ह्याची नोंद करण्यात आली असून पुढील तपास पोलीस हेड कॉन्स्टेबल कानिफनाथ जाधव करत आहेत.