संगमनेर तालुक्यात भीषण अपघात; आयशर टेम्पोच्या धडकेत चुलती-पुतणीचा जागीच मृत्यू
महाराष्ट्र संवाद न्यूज ऑनलाईन, संगमनेर:
संगमनेर तालुक्यातील पिंपळगाव देपा शिवारातील मोधळवाडी घाटात मंगळवारी दुपारी १२ वाजेच्या सुमारास एक हृदयद्रावक अपघात घडला. एका भरधाव आयशर टेम्पोने दुचाकीला जोराची धडक दिल्याने झालेल्या या भीषण अपघातात चुलती आणि पुतणीचा जागीच मृत्यू झाला.
जया दत्तात्रय थोरात (वय २९) आणि अस्मिता दादाभाऊ थोरात (वय १६, दोन्ही रा. मोधळवाडी) अशी मृतांची नावे असून, या घटनेमुळे संपूर्ण परिसरात शोककळा पसरली आहे.
मिळालेल्या माहितीनुसार, जया थोरात आणि अस्मिता थोरात या दुचाकीवरून मोधळवाडी घाट उतरत होत्या. याच वेळी समोरून घाट चढून येणाऱ्या आयशर टेम्पोने त्यांच्या दुचाकीला जोरदार धडक दिली. या धडकेमुळे दुचाकीवरील दोघीही खाली पडल्या आणि टेम्पोच्या चाकाखाली चिरडल्या गेल्या. हा अपघात इतका भीषण होता की, त्या दोघांचाही जागीच अंत झाला. घटनेनंतर चालक आपला टेम्पो सोडून घटनास्थळावरून पसार झाला आहे.
अपघाताची माहिती मिळताच स्थानिक नागरिकांनी मदतीसाठी धाव घेतली आणि घारगाव पोलिसांना पाचारण केले. पोलिसांनी तातडीने घटनास्थळी पोहोचून अपघातग्रस्त टेम्पो ताब्यात घेतला आणि दोन्ही मृतदेह शवविच्छेदनासाठी संगमनेर येथील कुटीर रुग्णालयात पाठवले.
याप्रकरणी घारगाव पोलीस फरार चालकाचा शोध घेत आहेत. एकाच कुटुंबातील दोन जणींचा असा दुर्दैवी अंत झाल्याने मोधळवाडी गावावर दुःखाचा डोंगर कोसळला आहे.
