महाराष्ट्र संवाद न्यूज ऑनलाईन, अकोले
समाजात ‘गुरुजी’ या पदाला अत्यंत आदराचे स्थान आहे, मात्र अकोले तालुक्यातील एका घटनेने या पदाच्या प्रतिष्ठेला मोठा धक्का बसला आहे. आपल्या अल्पवयीन मुलाला कार चालवायला देऊन आणि स्वतः मद्याच्या नशेत धुंद राहून एका शिक्षकाने बेजबाबदारपणाचा कळस गाठला आहे. या प्रकारामुळे परिसरात खळबळ उडाली असून संबंधित शिक्षकावर कठोर कायदेशीर कारवाई करण्याची मागणी आता जोर धरू लागली आहे.
मिळालेल्या माहितीनुसार, रविवारी (३ मे) अकोले तालुक्यातील गुरवझाप पीरसाईनगर येथील शिक्षक रामदास भांगरे हे त्यांच्या कुटुंबासह स्विफ्ट कारने (क्रमांक MH 02 BJ 9347) प्रवास करत होते. यावेळी शिक्षक भांगरे हे स्वतः मद्यधुंद अवस्थेत होते आणि त्यांनी कारचे नियंत्रण स्वतःकडे न ठेवता आपल्या अवघ्या १० ते ११ वर्षांच्या मुलाच्या हाती स्टेअरिंग दिले होते. हा अल्पवयीन मुलगा भरधाव वेगाने कार चालवत होता आणि रस्त्यावरील इतर वाहनांना अतिशय धोकादायक पद्धतीने कट मारत होता.
हा प्रकार नवलेवाडी फाट्याजवळ उपस्थित असलेल्या नागरिकांच्या निदर्शनास आला. कार चालवणारा मुलगा लहान असल्याचे पाहून आणि गाडीचा वेग धोकादायक असल्याने निखिल रावसाहेब चौधरी व इतर प्रवाशांनी पथिक पेट्रोल पंप परिसरात ही कार थांबवली. नागरिकांनी जेव्हा संबंधित शिक्षकाला विचारणा केली आणि मुलाच्या हातात गाडी देणे कायद्याने गुन्हा असल्याचे समजावून सांगण्याचा प्रयत्न केला, तेव्हा शिक्षक रामदास भांगरे यांनी आपली चूक मान्य करण्याऐवजी नागरिकांशीच हुज्जत घातली. त्यांनी अत्यंत उद्धटपणे आणि मगरुरीने वागणूक दिल्याने उपस्थितांमध्ये संताप व्यक्त करण्यात आला.
या संपूर्ण घटनेचे व्हिडिओ चित्रीकरण करण्यात आले असून त्यामध्ये अल्पवयीन मुलगा कार चालवताना स्पष्ट दिसत आहे. तक्रारदार निखिल चौधरी यांनी या प्रकरणी पंचायत समिती अकोले येथील महिला व बालकल्याण विभागाकडे लेखी तक्रार दाखल केली आहे. या तक्रारीसोबत व्हिडिओ आणि फोन कॉल रेकॉर्डिंगचे पुरावे जोडण्यात आले आहेत. दरम्यान, या विषयावर जाब विचारला म्हणून बाळू खाडे नावाच्या अन्य एका शिक्षकाने तक्रारदाराला फोन करून दमदाटी केल्याचाही आरोप करण्यात आला असून, यामुळे या प्रकरणाचे गांभीर्य अधिकच वाढले आहे.
तक्रारदाराने या प्रकरणात भारतीय न्याय संहिता (BNS) २०२३ मधील कलम १२५ (मानवी जीवितास धोका निर्माण करणे), कलम ३५१(२) (धमकावणे) तसेच बाल न्याय अधिनियम २०१५ आणि मोटार वाहन कायद्यानुसार कारवाई करण्याची मागणी केली आहे. संबंधित शिक्षकावर शिक्षण विभागामार्फत तात्काळ शिस्तभंगाची कारवाई करावी आणि त्या अल्पवयीन मुलाला बाल कल्याण समितीमार्फत समुपदेशनासाठी पाठवावे, असेही अर्जात नमूद करण्यात आले आहे.
विद्यार्थ्यांना शिस्त, संस्कार आणि नियम पाळण्याचे धडे देणारे शिक्षकच जर मद्यधुंद अवस्थेत असे बेकायदेशीर कृत्य करत असतील, तर समाजाने कोणाकडे पाहावे, असा प्रश्न अकोले तालुक्यातील नागरिक विचारत आहेत. या शिक्षकाच्या बेजबाबदारपणामुळे रस्त्यावरील निष्पाप लोकांचा बळी गेला असता, अशी भीतीही व्यक्त केली जात आहे. आता या प्रकरणी पोलीस प्रशासन आणि शिक्षण विभाग नेमकी काय पावले उचलते, याकडे संपूर्ण जिल्ह्याचे लक्ष लागले आहे.
