वैद्यकीय अधिकाऱ्याची बदनामी केल्याप्रकरणी संगमनेरात वृत्तपत्र संपादकांविरुद्ध अदखलपात्र गुन्हा दाखल
महाराष्ट्र संवाद न्यूज ऑनलाईन, संगमनेर:
घुलेवाडी येथील ग्रामीण रुग्णालयात कार्यरत असलेले वैद्यकीय अधिकारी डॉ. प्रशांत सुरेश थोरात यांची समाजमाध्यमे आणि वृत्तपत्राद्वारे बदनामी केल्याप्रकरणी ‘बांधीलकी जनहिताची… नायक’ या सायं दैनिकाचे संपादक गोरक्षनाथ मदने आणि कार्यकारी संपादक शाम तिवारी यांच्या विरोधात संगमनेर शहर पोलीस ठाण्यात अदखलपात्र गुन्ह्याची नोंद करण्यात आली आहे.
या घटनेची अधिक माहिती अशी की, ९ मे २०२६ रोजी ग्रामीण रुग्णालय घुलेवाडी येथे सिद्धार्थ नितीन कुमार या २७ वर्षीय तरुणाला मृत अवस्थेत आणण्यात आले होते. डॉ. थोरात यांनी कर्तव्यावर असताना मृतदेहाची तपासणी केली असता, मृताच्या नाका-तोंडातून रक्त येत असल्याचे आणि डोळे सुजलेले असल्याचे त्यांच्या निदर्शनास आले.
हा मृत्यू संशयास्पद वाटल्याने आणि मृत्यूचे नेमके कारण स्पष्ट व्हावे या उद्देशाने डॉ. थोरात यांनी कायदेशीर प्रक्रिया पूर्ण करून मृतदेह उत्तरीय तपासणीसाठी प्रवरा लोणी येथील फॉरेन्सिक तज्ज्ञांकडे पाठवण्याचा निर्णय घेतला. त्यानुसार त्यांनी सकाळी साडे आठच्या सुमारास रेफर लेटर दिले होते.
मात्र, या शासकीय कर्तव्याचे पालन करत असतानाच १२ आणि १३ मे २०२६ रोजी ‘नायक’ वेब पोर्टल आणि सायं दैनिकातून डॉ. प्रशांत थोरात यांच्या विरोधात खोटी बातमी प्रसारित करण्यात आली.
या बातमीमध्ये डॉ. थोरात यांच्यासाठी ‘दानव’, ‘दलाल’ आणि ‘पांढरा हत्ती’ यांसारख्या अत्यंत अपमानजनक शब्दांचा वापर करण्यात आला. कोणतीही शहानिशा न करता अशा प्रकारची खोटी बातमी प्रसिद्ध केल्यामुळे समाजात आपली प्रतिमा मलिन झाली असून मोठी बदनामी झाली असल्याची तक्रार डॉ. थोरात यांनी पोलीस ठाण्यात दिली आहे.
डॉ. थोरात यांनी दिलेल्या फिर्यादीवरून संगमनेर शहर पोलिसांनी भारतीय न्याय संहिता (BNS), २०२३ च्या कलम ३५६(२) अन्वये संपादक गोरक्षनाथ मदने आणि कार्यकारी संपादक शाम तिवारी यांच्या विरोधात दिलेल्या तक्रारीवरून गुन्हा दाखल केला आहे. या प्रकरणाचा पुढील तपास पोलीस हवालदार भांगरे करत आहेत.
