अहिल्यानगर पोलीस मुख्यालयात सराव दरम्यान हँडग्रेनेडचा स्फोट; चार प्रशिक्षणार्थी जवान जखमी

महाराष्ट्र संवाद न्यूज ऑनलाईन, अहिल्यानगर:

येथील पोलीस मुख्यालयाच्या मैदानावर नियमित प्रशिक्षण सुरू असताना एका स्मोक हँडग्रेनेडचा अचानक स्फोट झाल्याची धक्कादायक घटना सोमवारी सकाळी १० वाजण्याच्या सुमारास घडली. या अपघातात चार प्रशिक्षणार्थी पोलीस कर्मचारी गंभीर जखमी झाले असून मुख्यालय परिसरात काही काळ भीतीचे वातावरण निर्माण झाले होते.

या स्फोटात शिवराज पवार, शुभम कावरे, गणेश मढे आणि योगेश सोळंके हे चार प्रशिक्षणार्थी पोलीस कर्मचारी जखमी झाले. त्यापैकी दोघांच्या हाताच्या बोटांना अत्यंत गंभीर दुखापत झाली असून त्यांच्यावर जवळच्या खाजगी रुग्णालयात तज्ज्ञ डॉक्टरांच्या देखरेखीखाली उपचार सुरू आहेत. यातील काही जवानांची प्रकृती चिंताजनक असल्याचे सूत्रांकडून समजते.

मिळालेल्या माहितीनुसार, जमाव नियंत्रणात आणण्यासाठी वापरण्यात येणाऱ्या स्मोक हँडग्रेनेडची हाताळणी कशी करावी, याबाबत प्रशिक्षणार्थी जवानांना मार्गदर्शन केले जात होते. प्रत्यक्ष प्रात्यक्षिक सुरू असतानाच संबंधित जवानाने ग्रेनेडची पिन काढली. मात्र, त्याच वेळी त्यांच्या हातातील लिव्हर अचानक निसटल्याने ग्रेनेडचा हातातच मोठा स्फोट झाला.

घटनेची माहिती मिळताच वरिष्ठ पोलीस अधिकाऱ्यांनी तातडीने घटनास्थळी धाव घेतली. राखीव पोलीस निरीक्षक उमेश परदेशी यांनी दिलेल्या प्राथमिक माहितीनुसार, भविष्यात अशा दुर्घटना टाळण्यासाठी प्रशिक्षण प्रक्रियेत अधिक कडक सुरक्षा उपाययोजना राबवल्या जातील.

या अपघाताचे नेमके कारण शोधण्यासाठी एका विशेष पथकाची नियुक्ती करण्यात आली असून, प्रशिक्षणादरम्यान वापरल्या जाणाऱ्या स्फोटक साहित्याच्या सुरक्षिततेचा आणि सुरक्षा व्यवस्थेचा सखोल आढावा घेतला जात आहे.