आतापर्यंत हे आंदोलन केवळ महाविकास आघाडीच्या नेतृत्वाखाली सुरू होते. मात्र, आंदोलकांची गळचेपी करण्यासाठी शासनाने ज्या प्रकारे बळाचा वापर केला आहे, ते पाहता आता डावे पक्ष आणि शेतकरी संघटना या आंदोलनात पूर्ण ताकदीने उतरल्या आहेत. मार्क्सवादी कम्युनिस्ट पक्ष, किसान सभा आणि इतर डाव्या आघाडीच्या नेत्यांशी याबाबत सविस्तर चर्चा झाली असून, आगामी काळात हे आंदोलन अधिक व्यापक आणि तीव्र करण्याचा निर्धार व्यक्त करण्यात आला आहे. विविध शेतकरी नेते आणि संघटनांना एकत्र आणून या आंदोलनाची व्याप्ती राज्यभर वाढवली जाणार आहे.
पोलिसांनी दडपशाहीचा अवलंब करून हे आंदोलन मोडून काढण्याचा केलेला प्रयत्न अत्यंत दुर्दैवी असून, लोकशाही मार्गाने चाललेला हा लढा असा थांबणार नाही, असा इशारा शेतकरी नेत्यांनी दिला आहे. कांदा उत्पादक शेतकऱ्यांनी आपल्या न्याय्य हक्कांसाठी कोणत्याही दडपशाहीला न घाबरता या आंदोलनात मोठ्या संख्येने सहभागी व्हावे, असे आवाहन किसान सभेच्या वतीने कॉम्रेड डॉ. अजित नवले यांनी केले आहे.
