अवैध गोवंश तस्करी व गोमांसावर संगमनेर पोलिसांची मोठी कारवाई; ३९ गोवंश हस्तगत, २६ लाख ७० हजारांचा मुद्देमाल जप्त

महाराष्ट्र संवाद न्यूज ऑनलाईन, संगमनेर:

आगामी बकरी ईद सणाच्या पार्श्वभूमीवर संगमनेर पोलिसांनी अवैध गोवंश आणि गोमांस तस्करीविरोधात एक मोठी कारवाई केली आहे. या कारवाईत पोलिसांनी वेगवेगळ्या भागात छापे टाकून तब्बल ३९ गोवंश ताब्यात घेतले असून, त्यांची अंदाजे किंमत २६ लाख ७० हजार रुपये इतकी आहे. या प्रकरणी संगमनेर शहर पोलीस ठाण्यात एकूण आठ गुन्हे दाखल करण्यात आले आहेत.

२८ आणि २९ मे रोजी साजरा होणाऱ्या बकरी ईद सणाच्या पार्श्वभूमीवर शहरात तसेच परिसरात कोणत्याही प्रकारे अवैध गोवंश किंवा गोमांसाची वाहतूक व विक्री होऊ नये, यासाठी जास्तीत जास्त कारवाया करण्याचे आदेश अहिल्यानगरचे पोलीस अधीक्षक मुमक्का सुदर्शन यांनी दिले होते. या सूचनांचे गांभीर्य ओळखून संगमनेर शहर पोलीस ठाण्याच्या हद्दीत २६ मे च्या रात्रीपासून ते २७ मे २०२६ च्या पहाटेपर्यंत वेगवेगळ्या संशयास्पद परिसरांमध्ये एकाच वेळी अचानक छापे टाकण्यात आले.

या संपूर्ण कारवाईदरम्यान पोलिसांनी मोठ्या प्रमाणात अवैध गोवंश जप्त करण्यात यश मिळवले. कारवाईत ताब्यात घेण्यात आलेल्या सर्व ३९ गोवंशांना तातडीने पुढील सुरक्षिततेसाठी आणि योग्य देखभालीसाठी सायखिंडी (ता. संगमनेर) येथील ‘जीवदया गोशाळेत’ पाठवण्यात आले आहे. ऐन सणाच्या तोंडावर पोलिसांनी घेतलेल्या या आक्रमक भूमिकेमुळे तस्करांचे धाबे दणाणले आहेत.

ही उल्लेखनीय कामगिरी पोलीस अधीक्षक मुमक्का सुदर्शन, श्रीरामपूरचे अपर पोलीस अधीक्षक सोमनाथ वाघचौरे यांच्या आदेशाने आणि संगमनेर विभागाचे उपविभागीय पोलीस अधिकारी डॉ. कुणाल सोनवणे यांच्या थेट मार्गदर्शनाखाली पार पडली.

या मोहिमेत संगमनेर शहर पोलीस ठाण्याचे पोलीस निरीक्षक समीर बारवकर, पोलीस उपनिरीक्षक रावसाहेब लोखंडे, पोलीस उपनिरीक्षक श्रीकांत सावंत, पोलीस हेडकॉन्स्टेबल बाबासाहेब सातपुते, पोलीस कॉन्स्टेबल विशाल कर्पे, आत्माराम पवार, राहुल पांडे, रामकिसन मुकरे, विजय खुळे, अनिल खताळ, सागर नागरे, संदीप कोंडे आणि सागर पठाडे आदी अधिकारी, कर्मचाऱ्यांचा समावेश होता.