अहिल्यानगरमध्ये एक लाख रुपयांची लाच मागितल्याप्रकरणी पोलीस उपनिरीक्षकावर गुन्हा दाखल

महाराष्ट्र संवाद न्यूज ऑनलाईन, अहिल्यानगर:

नगर तालुका पोलीस स्टेशनचे पोलीस उपनिरीक्षक जयेश मोतीलाल गांगुर्डे यांच्याविरुद्ध लाचलुचपत प्रतिबंधक विभागाने कारवाई केली असून, त्यांच्यावर तोफखाना पोलीस स्टेशन येथे गुन्हा दाखल करण्यात आला आहे. तक्रारदाराच्या मामासह अन्य १५ नातेवाईकांवर दाखल असलेल्या एका गुन्ह्याच्या तपासात मदत करण्यासाठी त्यांनी एक लाख रुपयांची लाच मागितल्याचे निष्पन्न झाले आहे.

या प्रकरणातील तक्रारदाराच्या नातेवाईकांवर ११ मे २०२६ रोजी नगर तालुका पोलीस स्टेशनमध्ये गुन्हा दाखल झाला होता, याचा तपास पोलीस उपनिरीक्षक जयेश गांगुर्डे करत होते. या तपासात सहकार्य करण्यासाठी गांगुर्डे यांनी सुरुवातीला दोन लाख रुपयांच्या लाचेची मागणी केली होती. त्यामुळे तक्रारदाराने १८ मे २०२६ रोजी लाचलुचपत प्रतिबंधक विभागाकडे तक्रार नोंदवली.

त्यानंतर त्याच दिवशी पोलीस मुख्यालय, अहिल्यानगर येथे लाचेच्या मागणीची पडताळणी करण्यात आली. या पडताळणी दरम्यान जयेश गांगुर्डे यांनी तडजोडीअंती एक लाख रुपयांची लाच मागून ती स्वीकारण्यास संमती दर्शवली. लाचेची मागणी सिद्ध झाल्यानंतर बुधवारी त्यांच्याविरुद्ध भ्रष्टाचार प्रतिबंध अधिनियम १९८८ च्या कलम ७ अन्वये गुन्हा दाखल करण्यात आला.

ही कारवाई लाचलुचपत प्रतिबंधक विभागाचे पोलीस निरीक्षक राजू आल्हाट, पोलीस नाईक चंद्रकांत काळे, पोलीस काँस्टेबल किशोर कुळधर आणि शेखर वाघ यांच्या पथकाने केली असून, पुढील तपास पोलीस निरीक्षक श्रीमती छाया देवरे करत आहेत. ही संपूर्ण कारवाई नाशिक परिक्षेत्राचे पोलीस अधीक्षक भारत तांगडे, अपर पोलीस अधीक्षक माधव रेड्डी, सुनील दोरगे आणि पोलीस उपअधीक्षक अजित त्रिपूटे यांच्या मार्गदर्शनाखाली करण्यात आली.