भंडारदऱ्यात वनरक्षकाला मारहाण; मुंबईतील पोलीस पिता-पुत्रावर गुन्हा दाखल

महाराष्ट्र संवाद न्यूज ऑनलाईन, भंडारदरा

अकोले तालुक्यातील भंडारदरा परिसरातील पांजरे नाक्यावर काजवे महोत्सवासाठी पर्यटकांची मोठी गर्दी होत आहे. येथील टोल नाक्यावर वाहनांच्या रांगा लागलेल्या असताना, ‘माझ्या मुलाला का थांबवले’ या कारणावरून मुंबई पोलीस दलात कार्यरत असलेले लक्ष्मण बांगर आणि त्यांचा मुलगा साई बाळू बांगर यांनी वनरक्षक चंद्रकांत भरत तळपाडे यांना मारहाण केल्याची धक्कादायक घटना घडली आहे. याप्रकरणी राजूर पोलीस ठाण्यात गुन्हा दाखल करण्यात आला आहे.

पांजरे नाक्यावर वाहनांची तपासणी आणि शुल्क आकारणीचे काम सुरू असताना एमएच ०५ ईक्यू २६५१ क्रमांकाची पांढऱ्या रंगाची मारुती सुझुकी एक्सएल-६ कार तेथे आली. या कारच्या डॅशबोर्डवर ‘पोलीस’ अशी पाटी आणि लाल-निळ्या रंगाचा एलईडी लाईट लावलेला होता. नाक्यावर वाहनांची रांग असल्याने वनरक्षकांनी चालकाला गाडी रांगेत उभी करण्यास सांगितले.

याचा राग आल्याने चालकाने ‘मी स्थानिक मुरशेत गावाचा रहिवासी असून रांगेत थांबणार नाही, माझे वडीलही पोलीस आहेत, तुझ्याकडे पाहतोच’ अशी धमकी देऊन वडिलांना फोन लावला. त्यानंतर त्याने गाडी जोरात पुढे नेत कर्मचाऱ्याच्या अंगावर घालण्याचा प्रयत्न केला.

काही वेळातच त्याचे वडील लक्ष्मण बांगर त्या ठिकाणी आले. वनरक्षक तळपाडे गणवेशात असतानाही त्यांनी काहीही ऐकून न घेता त्यांच्या गणवेशाची कॉलर धरली आणि तोंडात, डाव्या कानावर व पाठीवर मारहाण केली. ‘मी येथील स्थानिक असून माझ्या मुलाला का थांबवले’ असे म्हणत त्यांनी शिवीगाळ केली आणि ‘पुन्हा आमच्या नादी लागला तर जीवे मारून टाकीन’ अशी धमकी देऊन दोघेही तेथून निघून गेले.

या फिर्यादीवरून राजूर पोलिसांनी गुन्हा दाखल केला असून सहाय्यक पोलीस निरीक्षक किशोर पवार पुढील तपास करीत आहेत.