“81 लाख लाडक्या बहिणींना अपात्र ठरवून सरकारची मोठी फसवणूक; महिलांच्या विश्वासाला तडा” – बाळासाहेब थोरातांचा घणाघात

संगमनेर | प्रतिनिधी

राज्यातील तब्बल ८१ लाख महिलांना ‘लाडकी बहीण’ योजनेतून अपात्र ठरवून महायुती सरकारने महिलांच्या विश्वासाला तडा दिला असून ही महिलांची सरळसरळ फसवणूक असल्याचा गंभीर आरोप काँग्रेसचे ज्येष्ठ नेते व माजी मंत्री बाळासाहेब थोरात यांनी केला आहे. संगमनेर येथे माध्यमांशी संवाद साधताना त्यांनी सरकारवर जोरदार हल्लाबोल केला.

लाडक्या बहिणींनी विश्वास ठेवून मतदान केले म्हणूनच हे सरकार सत्तेवर आले. मात्र सत्तेत आल्यानंतर त्याच महिलांना योजनेतून बाहेर काढण्याचे काम सरकारने केले आहे. ८१ लाख महिलांना अपात्र ठरवणे म्हणजे त्यांच्या आशा-आकांक्षांवर पाणी फेरण्यासारखे आहे, असे थोरात म्हणाले.

यावेळी त्यांनी राज्यातील राजकीय आणि सामाजिक परिस्थितीवरही भाष्य केले. महाराष्ट्राची सुसंस्कृत राजकीय परंपरा ढासळत चालली असून भ्रष्टाचार मोठ्या प्रमाणात वाढल्याचा आरोप त्यांनी केला. भ्रष्टाचारातून मिळालेला पैसा मतदारांपर्यंत पोहोचवला जात आहे. त्यामुळे प्रामाणिक कार्यकर्त्यांचे महत्त्व कमी होत आहे, अशी खंत त्यांनी व्यक्त केली.

भाजपमध्ये मोठ्या प्रमाणावर इतर पक्षांतील नेत्यांचे स्वागत होत असल्याकडे लक्ष वेधत थोरात म्हणाले, सर्वांनाच भाजपमध्ये घेतले जात आहे. अशीच परिस्थिती राहिली तर एक दिवस मूळ भाजप कार्यकर्तेच शोधावे लागतील. देशात प्रादेशिक पक्ष संपवण्याचा प्रयत्न सुरू असून भविष्यात केवळ काँग्रेस आणि भाजप हे दोनच पक्ष उरतील अशी परिस्थिती निर्माण होत आहे.

काँग्रेस पक्षात नव्या पिढीला मोठी संधी असल्याचे सांगत त्यांनी आगामी काळात काँग्रेस नवीन नेतृत्व घडवेल आणि जनतेचा विश्वास पुन्हा संपादन करेल, असा विश्वास व्यक्त केला. राज्यातील सध्याचे राजकारण दुर्दैवी व चिंताजनक असल्याचे सांगत, या घडामोडींकडे जनतेने सजगपणे पाहिले पाहिजे. लोकशाहीतील बिघाड दुरुस्त करण्याची जबाबदारीही जनतेचीच आहे, असे आवाहन थोरात यांनी केले.