महायुतीत बंडखोरीची चिन्हे; शिवसेनेचं डोकं उडवण्याचं काम भाजप करत आहे: अब्दुल सत्तार यांच्या आरोपाने महायुतीत खळबळ

विशेष प्रतिनिधी / मुंबई

राज्यातील विधानपरिषद निवडणुकीच्या अर्ज भरण्याच्या अंतिम टप्प्यात छत्रपती संभाजीनगर-जालना स्थानिक स्वराज्य संस्था मतदारसंघातून एक मोठी बातमी समोर आली आहे. महायुतीच्या जागावाटपात ही जागा भाजपला सुटली असून भाजपने सुहास शिरसाट यांना उमेदवारी दिली आहे. मात्र, या निर्णयाला धुडकावून लावत शिवसेनेचे नेते अब्दुल सत्तार यांचे पुत्र समीर सत्तार यांनी अपक्ष अर्ज दाखल केला आहे. यानंतर स्वतः अब्दुल सत्तार यांनी भाजपवर अत्यंत गंभीर आणि खळबळजनक आरोप करत महायुतीमधील अंतर्गत वाद चव्हाट्यावर आणले आहेत.

विधानपरिषद निवडणुकीत अपेक्षेप्रमाणे जागा न मिळाल्याने सत्तार यांचा भाजपवरील राग अनावर झाला. अत्यंत आक्रमक भाषेत भाजपवर प्रहार करताना ते म्हणाले, शिवसेनेचे मुंडकं उडवण्याचं काम आपला मित्रपक्षच करत आहे. आमचा त्याग गुवाहाटीतील कामाख्या देवीला माहिती आहे, पण भाजप तो त्याग आता पूर्णपणे विसरली आहे.

भाजप आमच्या पक्षात गटतट पाडत आहे. त्यांनी आमचे हातपाय आधीच तोडले होते, आता थेट मुंडकंच तोडून टाकलं आहे. आमची जिल्हा परिषद गेली, महापालिकेत शिवसेना प्रमुख बाळासाहेब ठाकरे यांच्या काळापासून असणारी सत्ताही संपली, आता आमच्याकडे राहिलं काय? अनेक छोट्या जागांवर वैयक्तिक भाजपचे नेते मोठे होत आहेत आणि शिवसेनेला संपवले जात आहे, असा उघड आरोप सत्तार यांनी केला.

शिवसेनेची शकलं झाल्याचा फायदा भाजप घेत असल्याचा आरोप करताना सत्तार यांनी एका भागाला हाताशी धरायचं आणि दुसऱ्यावर अन्याय करायचा, अशी खेळी खेळून जर आमचा ‘मोठा भाऊ’ आम्हालाच संपवणार असेल, तर आमच्याकडे दुसरा इलाज नाही, असा इशारा त्यांनी यावेळी दिला.

महाराष्ट्रातील राजकीय परिस्थितीची तुलना थेट पश्चिम बंगालशी करताना सत्तार म्हणाले, पश्चिम बंगालमध्ये एकेकाळी ममता बॅनर्जी आणि भाजप एकत्र होते. नंतर त्यांच्यातील समन्वय तुटला आणि आज ते एकमेकांना मारत आहेत. महाराष्ट्रात आमची तशी ‘ममता’ होऊ नये, याची काळजी आणि दक्षता माझ्यासारख्या कार्यकर्त्यांनी घेतली पाहिजे. आमचा नेता शेतकरी, दलित, मजूर आणि सर्व जातीधर्माला सोबत घेऊन जाणारा आहे, त्यामुळे आमची ममता होणे शक्य नाही, असं देखील ते म्हणाले.

अब्दुल सत्तार यांच्या विधानावर आता भाजप काय पलटवार करणार? हे पाहणं महत्त्वाचं ठरणार आहे. दुसरीकडे, उमेदवारी अर्ज भरण्याच्या अवघ्या काही तास आधी समीर सत्तार यांच्या कार्यकर्त्यांनी उमेदवारी अर्ज दाखल केल्याने महायुतीत मिठाचा खडा पडण्याची शक्यता आहे. चार जून रोजी उमेदवारी अर्ज मागे घेण्याची अंतिम मुदत आहे, तोपर्यंत सत्तारांचं हे बंड शांत होतं की महायुतीमध्ये उभी फूट पडते? याकडे आता सर्वांचे लक्ष लागलं आहे.