राजूर ‘फेक मर्डर केस’ : दोन पोलीस निरीक्षक निलंबित, DGP सदानंद दाते आढावा बैठक घेण्याची शक्यता

बुलढाणा:
राज्यभर खळबळ उडवून देणाऱ्या जळगाव जामोद येथील कथित ‘फेक मर्डर केस’ प्रकरणात तपासात गंभीर हलगर्जीपणा केल्या ठपक्यावरून तत्कालीन एलसीबी पोलीस निरीक्षक सुनील अंबुलकर आणि तपास अधिकारी नितीन पाटील या दोन अधिकाऱ्यांना अमरावती पोलीस आयुक्तांनी निलंबित केले आहे.
जळगाव जामोद पोलीस ठाण्याच्या हद्दीतील राजुर धरण परिसरात काही दिवसांपूर्वी एका अनोळखी तरुणीचा मृतदेह सापडला होता. या मृतदेहाची ओळख पटण्यापूर्वी आणि डीएनए अहवाल येण्याआधीच पोलिसांनी तो मृतदेह ‘शिवानी’ नावाच्या तरुणीचा असल्याचा दावा केला.
धक्कादायक बाब म्हणजे, शिवानी प्रत्यक्षात जिवंत असतानाही पोलिसांनी तिला मृत घोषित केले आणि तिच्या कथित हत्येच्या आरोपाखाली तिच्या वडील व भावाला अटक केली. पोलिसांनी आपल्याला उलटे टांगून मारहाण केली आणि न केलेल्या खुनाची कबुली देण्यास भाग पाडले, असा गंभीर आरोप या बाप-लेकांनी पोलिसांवर केला आहे.
या संपूर्ण प्रकरणातील पोलिसांच्या गंभीर त्रुटी आणि संशयास्पद भूमिकेची दखल घेत वरिष्ठ पातळीवर ही निलंबनाची कारवाई करण्यात आली आहे. या प्रकरणाचे गांभीर्य लक्षात घेता राज्याचे पोलीस महासंचालक सदानंद दाते उद्या जळगाव जामोदला भेट देणार असून, बुलढाणा पोलिसांची आढावा बैठक घेऊन महत्त्वाच्या सूचना देण्याची शक्यता आहे. या कारवाईमुळे पोलीस वर्तुळात मोठी खळबळ उडाली आहे.