बनावट दारू तयार करणाऱ्यावर राज्य उत्पादन शुल्काची मोठी कारवाई; १ लाख ४६ हजारांचा मुद्देमाल जप्त

महाराष्ट्र संवाद न्यूज ऑनलाईन
श्रीरामपूर:
राज्य उत्पादन शुल्क विभागाच्या श्रीरामपूर येथील भरारी पथक क्रमांक २ ने एका कारवाईत बनावट परदेशी दारू तयार करणाऱ्या व्यक्तीला रंगेहात पकडले आहे. याप्रकरणी घटनास्थळावरून पोपट भास्कर पवार याच्याविरुद्ध महाराष्ट्र दारूबंदी कायदा १९४९ च्या विविध कलमांन्वये गुन्हा नोंदवून त्याला अटक करण्यात आली आहे.
श्रीरामपूर येथील आशीर्वाद नगर भागात एका व्यक्तीकडून नामांकित ब्रँडची बनावट दारू तयार केली जात असल्याची खात्रीशीर माहिती पथकाला मिळाली होती. या माहितीच्या आधारे पथकाने तातडीने सदर ठिकाणी छापा टाकला. या छाप्यात ‘इम्पेरियल ब्लू’ आणि ‘रॉयल स्टॅग’ या नामांकित ब्रँड्सच्या व्हिस्कीच्या बनावट असलेल्या एकूण ११७ बाटल्या, एक दुचाकी वाहन आणि इतर साहित्य असा एकूण १ लाख ४६ हजार ५९५ रुपयांचा मुद्देमाल जप्त करण्यात आला आहे.
सदर कारवाई राज्य उत्पादन शुल्क महाराष्ट्र राज्याचे आयुक्त राजेश देशमुख, विभागीय उपायुक्त सागर धोमकर, अधीक्षक प्रमोद सोनोने, अधीक्षक ऋषिकेश इंगळे आणि उपअधीक्षक प्रवीणकुमार तेलंग यांच्या मार्गदर्शनाखाली पार पडली. या कारवाईत निरीक्षक एस. एस. हांडे, दुय्यम निरीक्षक एस. सी. मांडवेकर, पी. आर. गायकवाड आणि पथकातील इतर जवानांनी सहभाग घेतला असून पुढील तपास निरीक्षक एस. एस. हांडे करत आहेत.
दरम्यान, या कार्यालयाच्या कार्यक्षेत्रातील अवैध हातभट्टी निर्मितीचे केंद्र असलेले गोंधवणी, देवळाली प्रवरा आणि ममदापूर ही ठिकाणे सध्या स्थितीत बंद असल्याचे पथकाला आढळून आले आहे. अवैध व्यवसायांचे समूळ उच्चाटन करण्यासाठी मोजे ममदापूर, राजुरी (ता. राहाता) तसेच वारी (ता. कोपरगाव) येथील अवैध हातभट्टी करणाऱ्या व्यक्तींचे, संबंधित गावातील सरपंच व ग्रामस्थ यांच्यासोबत संयुक्त बैठक घेऊन त्यांचे समुपदेशन करण्यात आले आहे.
राज्य उत्पादन शुल्क विभागाने सर्व जनतेला आवाहन केले आहे की, मद्य खरेदी करताना ती केवळ परवानाधारक दुकानातूनच करावी. तसेच अवैध मद्य निर्मिती, विक्री किंवा वाहतुकीबाबत कोणतीही माहिती अथवा तक्रार असल्यास विभागाच्या १८०० २३३ ९९९९, ८४२२ ००११३३ किंवा ०२४१-२४७०८६० या क्रमांकांवर संपर्क साधावा.