तुकाराम मुंढे यांची पुन्हा बदली… सरकारला थेट इशारा

महाराष्ट्र संवाद न्यूज ऑनलाईन 

पुणे:

अन्न व औषध प्रशासन विभागाचे आयुक्त तुकाराम मुंढे यांच्या धडक कारवायांमुळे धास्तावलेल्या व्यापारी वर्गाकडून मुंढे यांच्या बदलीसाठी सरकारवर दबाव आणला जात आहे. बदलीच्या चर्चेवरून अखिल भारतीय ग्राहक पंचायतीने सरकारला थेट इशारा दिला आहे.

तुकाराम मुंढे यांनी पदभार स्वीकारल्यापासून राज्यभरात भेसळखोरांवर दररोज कठोर कारवाई करून कोट्यवधींचा माल जप्त केला आहे. पूर्वी मनुष्यबळाची कमतरता सांगणारा हा विभाग आता अत्यंत सक्रिय झाला असून, नुकतीच पुण्यात साडेपाच हजार किलो आंबे आणि भेसळयुक्त आमरस नष्ट करण्याची मोठी कारवाई करण्यात आली.

सनदी अधिकारी असलेले तुकाराम मुंढे हे कायम चर्चेत असतात. त्यांच्या कामकाजाच्या पद्धतीमुळे त्यांना वारंवार बदलीला सामोरे जावे लागते. याचबरोबर सरकारकडून अनेक वेळा त्यांना अडगळीच्या विभागांमध्ये नियुक्ती दिली जाते. त्यांच्याकडे अन्न व औषध प्रशासन विभागाचा कारभार दिल्यापासून हा विभाग खडबडून जागा झाला आहे. वर्षभरात बोटावर मोजता येतील एवढ्याच कारवाया करणारा हा विभाग आता दररोज धडक कारवाया करू लागला आहे.

२१ वर्षांच्या कारकिर्दीत २५ वेळा बदली झालेल्या मुंढे यांच्या पाठीशी अखिल भारतीय ग्राहक पंचायत खंबीरपणे उभी राहिली आहे. ही कारवाई ग्राहक हिताची असून सरकारने कोणत्याही दबावापुढे न झुकता त्यांची बदली करू नये, अशी मागणी ग्राहक पंचायतीचे विजय सागर यांनी केली आहे. यासाठी ग्राहकांमध्ये जनजागृती करून व्यापक स्वाक्षरी मोहीम राबवली जाईल आणि मुख्यमंत्र्यांना पत्र पाठवून मंत्रालयात त्यांची भेट घेतली जाईल, असा इशाराही त्यांनी दिला आहे.