पोलिसांची धडक कारवाई; गावठी पिस्तूल, चॉपर आणि जिवंत काडतुसांसह दोघांना अटक, मुख्य सूत्रधार फरार
याप्रकरणी श्रीरामपूर शहर पोलीस ठाण्यात भारतीय हत्यार कायद्यानुसार गुन्हा दाखल करण्यात आला
अप्पर पोलीस अधीक्षक सोमनाथ वाघचौरे यांना मिळालेल्या गोपनीय माहितीच्या आधारे पोलिसांच्या पथकाने जर्मन हॉस्पिटलच्या मागे, पाण्याच्या पाटाजवळ सापळा रचला होता. तिथे संशयास्पदरित्या थांबलेल्या दोन इसमांना ताब्यात घेऊन त्यांची झडती घेतली असता हा बेकायदेशीर हत्यारांचा साठा उघडकीस आला.
पोलिसांनी या दोघांची कसून चौकशी केली असता, त्यांनी ही हत्यारे शाहरुख पटेल (रा. संजयनगर, वॉर्ड क्र. १, श्रीरामपूर) याच्याकडून आणल्याची कबुली दिली. सध्या शाहरुख पटेल फरार असून पोलीस त्याचा शोध घेत आहेत. हे आरोपी हत्यारे कोणाकडून आणत होते, ती कोणाला विकणार होते की त्यांचा घातपाताचा काही वेगळा उद्देश होता, याचा तपास आता पोलीस करत आहेत.
