संगमनेर येथे शिवसेना (ठाकरे गट) आक्रमक; खासदार भाऊसाहेब वाकचौरे यांच्या प्रतिकात्मक पुतळ्याचे दहन

महाराष्ट्र संवाद न्यूज ऑनलाईन 
संगमनेर:
शिर्डी लोकसभा मतदारसंघाचे खासदार भाऊसाहेब वाकचौरे यांनी पुन्हा एकदा पक्ष बदल केल्याच्या निषेधार्थ बुधवारी संगमनेर येथे शिवसेना (उद्धव बाळासाहेब ठाकरे) पक्षाच्या वतीने तीव्र आंदोलन करण्यात आले. पक्षनिष्ठेशी तडजोड करणाऱ्या आणि मतदारांचा विश्वासघात करणाऱ्यांविरोधात भविष्यातही यापेक्षा तीव्र स्वरूपाचे आंदोलन छेडले जाईल, असा इशारा यावेळी शिवसेना पदाधिकाऱ्यांनी दिला आहे.
शिवसेना उपजिल्हाप्रमुख अमर कतारी व शहर प्रमुख अमित चव्हाण यांच्या नेतृत्वाखाली सायंकाळी साडेचार वाजता शिवसैनिकांनी एकत्र येत खासदार वाकचौरे यांच्या प्रतिकात्मक पुतळ्याचे दहन केले. या आंदोलनात संगमनेर शहर आणि तालुक्यातील शिवसैनिक, पदाधिकारी तसेच महिला आघाडीच्या कार्यकर्त्या मोठ्या संख्येने सहभागी झाल्या होत्या.
आंदोलनादरम्यान शिवसैनिकांनी खासदार वाकचौरे यांच्याविरोधात जोरदार घोषणाबाजी करत परिसर दणाणून सोडला. यावेळी पक्षाच्या पदाधिकाऱ्यांनी वाकचौरे यांच्यावर गद्दारीचा तीव्र आरोप केला. यापूर्वीही त्यांनी पक्षाशी प्रतारणा केली होती, मात्र त्यानंतर पक्षप्रमुख उद्धव ठाकरे यांची भेट घेऊन त्यांनी माफी मागितली होती. आयुष्यभर शिवसेनेतच राहण्याचे आश्वासन दिल्याने उद्धव ठाकरे यांनी मोठेपणा दाखवत त्यांना पुन्हा शिर्डीतून उमेदवारी दिली आणि ते निवडूनही आले.
मात्र, खासदार म्हणून विजयी होताच त्यांनी पुन्हा निष्ठा बदलून शिंदे गटात प्रवेश केल्याने शिवसैनिकांमध्ये तीव्र संताप असल्याचे पदाधिकाऱ्यांनी सांगितले. या फसवणुकीचा निषेध म्हणून आंदोलकांनी वाकचौरे यांच्या प्रतिकात्मक पुतळ्याला साडी नेसवून अनोख्या पद्धतीने संताप व्यक्त केला आणि नंतर त्याचे दहन केले.
या आक्रमक आंदोलनात शिवसेना उपजिल्हाप्रमुख अमर कतारी, शहरप्रमुख अमित चव्हाण व फैसल सय्यद, व्यापारी आघाडीचे संभव लोढा, तालुकाप्रमुख भीमाशंकर पावसे, विधानसभा प्रमुख अमोल डुकरे यांच्यासह अशोक बढे, अरुण भालेराव, रवी गिरी, बाळासाहेब घोडके, आसिफ तांबोळी, दीपक साळुंके, राजाभाऊ सातपुते, प्रकाश गायकवाड, सदाशिव हासे, गणेश धात्रक, राजश्रीताई राहणे, त्रिलोक कतारी, आदित्य गायकवाड, प्रशांत खजूरे, कैलास गायके आणि त्रिंबक शिंदे यांसह अनेक प्रमुख पदाधिकारी व कार्यकर्ते उपस्थित होते.