राजकीय गद्दारीच्या विरोधात माकप राज्यभर तीव्र निदर्शने करणार: डॉ. अजित नवले
सध्या विकासाच्या नावाखाली आणि मतदार संघातील निधीचा शस्त्रासारखा वापर करून ही पक्षांतरे घडवून आणली जात आहेत
या सहाही खासदारांना लोकशाही, धर्मनिरपेक्षता आणि संविधान रक्षणाच्या मुद्द्यावर माकप आणि डाव्या जनसंघटनांनी निवडणुकीत पाठिंबा दिला होता. कार्यकर्त्यांनी भाजप आणि मित्रपक्षांच्या विरोधात जीवाची बाजी लावून या खासदारांना निवडून आणले होते. यापूर्वी शिवसेना आणि राष्ट्रवादी काँग्रेसमध्ये पडलेली फूट, आमदारांचे पक्षांतर तसेच कांदा व दुधाचे कोसळलेले भाव यांमुळे जनतेमध्ये सत्ताधाऱ्यांविरोधात तीव्र असंतोष होता. शेतकऱ्यांचा हाच संताप किसान सभेच्या आंदोलनातून व्यक्त झाला होता, ज्यामुळे जनतेने भाजपला नाकारत महाविकास आघाडीच्या उमेदवारांना विजयी केले. मात्र, निवडून आल्यानंतर हेच खासदार पुन्हा भाजपला पाठिंबा देण्यासाठी शिंदे सेनेत सामील झाले आहेत, हा डाव्या पक्षांच्या कार्यकर्त्यांशी केलेला मोठा द्रोह आहे.
आमदार आणि खासदारांच्या या गद्दारीच्या प्रवृत्तीला लगाम घालण्यासाठी देशात निवडणूक आयोग व सरकारी यंत्रणांचा गैरवापर रोखणे आणि अमुलाग्र निवडणूक सुधारणा लागू करणे अत्यंत गरजेचे आहे. या सर्व प्रकारच्या राजकीय संधीसाधूपणाच्या विरोधात माकप व्यापक जनजागृती मोहीम राबवणार असून, पक्षाच्या सर्व शाखा, जन व वर्गीय संघटनांच्या सदस्यांनी आणि जनतेने या मोहिमेत मोठ्या संख्येने सहभागी व्हावे, असे आवाहन डॉ. अजित नवले यांनी केले आहे.
