संगमनेरमधील जमजम कॉलनीत अवैध कत्तलखान्यावर पोलिसांचा छापा; ३ आरोपी गजाआड ६ फरार, १५.८५ लाखांचा मुद्देमाल जप्त

महाराष्ट्र संवाद न्यूज ऑनलाईन
संगमनेर:
शहरातील जमजम कॉलनी परिसरात सुरू असलेल्या एका अवैध कत्तलखान्यावर स्थानिक गुन्हे शाखेने कारवाई केली आहे. या धडक मोहिमेत पोलिसांनी तीन आरोपींना रंगेहात ताब्यात घेतले असून, त्यांच्याकडून तब्बल १५ लाख ८५ हजार ५०० रुपये किमतीचा मुद्देमाल जप्त केला आहे. या कारवाईदरम्यान अन्य सहा आरोपी पोलिसांची चाहूल लागताच घटनास्थळावरून फरार झाले आहेत.
पोलीस अधीक्षक मुम्मका सुदर्शन यांच्या विशेष आदेशानुसार आणि पोलीस निरीक्षक संतोष मुटकुळे यांच्या थेट मार्गदर्शनाखाली स्थानिक गुन्हे शाखेचे पथक शहरातील अवैध धंद्यांचे समूळ उच्चाटन करण्यासाठी गस्त घालत होते. याच दरम्यान, जमजम कॉलनीतील सरकार लॉन्सजवळील एका मोकळ्या जागेत गोवंशीय जनावरांची बेकायदेशीरपणे कत्तल केली जात असल्याची आणि हे गोमांस विक्रीसाठी एका वाहनातून वाहून नेण्यात येणार असल्याची अत्यंत गोपनीय माहिती पोलीस पथकाला मिळाली.
मिळालेल्या गुप्त माहितीच्या आधारे स्थानिक गुन्हे शाखेच्या पथकाने तात्काळ सदर ठिकाणी छापा टाकला. पोलिसांचे वाहन येताना पाहताच कत्तलखान्यावरील संशयितांची पळापळ सुरू झाली. यात काही जण अंधाराचा फायदा घेऊन पळून जाण्यात यशस्वी झाले, तरीही पोलिसांनी अत्यंत शिताफीने तीन आरोपींना जागीच ताब्यात घेतले. अटक करण्यात आलेल्या आरोपींमध्ये अब्दुलनुर जब्बार कुरेशी (वय २०, रा. भारतनगर, संगमनेर), इमाम हुसैन शेख (वय २८, रा. सायन कोळीवाडा, मुंबई) आणि अहमद फारुन शहा (वय ३२, रा. वडाळा, मुंबई) यांचा प्रामुख्याने समावेश आहे.
सदर कारवाई दरम्यान पोलिसांनी घटनास्थळावरून सुमारे ३१०० किलो वजनाचे गोमांस जप्त केले असून, त्याची बाजारपेठेतील किंमत ९ लाख ३० हजार रुपये आहे. यासोबतच गोमांसाची वाहतूक करण्यासाठी वापरण्यात येणारे ६ लाख रुपये किमतीचे एक पिकअप वाहन, ५५ हजार रुपयांचे चार मोबाईल फोन, तसेच कत्तलीसाठी वापरली जाणारी सुरे, कुऱ्हाड आणि इतर धारदार साहित्य असा एकूण १५.८५ लाखांचा मुद्देमाल पोलिसांनी जप्त केला आहे.
या गुन्ह्यामध्ये साद मुस्ताक कुरेशी, शोएब मोईनउद्दीन कुरेशी, अयाज हबीब कुरेशी, अरकान हबीब कुरेशी, शमशुद्दीन नसिर कुरेशी आणि सलमान नावाचा अन्य एक इसम (पूर्ण नाव व पत्ता अज्ञात) हे सहा जण फरार झाले आहेत. या सर्वांविरोधात संगमनेर शहर पोलीस ठाण्यात भारतीय न्याय संहिता (बीएनएस) २०२३ मधील संबंधित कलमांसह महाराष्ट्र प्राणी संरक्षण कायद्यान्वये गुन्हा दाखल करण्यात आला आहे.