अवैध मुरूम आणि माती वाहतुकीबाबत जाब विचारल्याच्या रागातून हा हल्ला झाला असून, यामध्ये तलवारीचाही वापर करण्यात आला. सुदैवाने या घटनेत कोणीही जखमी झालेले नाही. बुधवारी रात्री दहा वाजेच्या सुमारास संगमनेर तालुक्यातील मालुंजे गावात ही धक्कादायक घटना घडली.
समजलेल्या माहितीनुसार पालकमंत्री राधाकृष्ण विखे पाटील यांचे समर्थक असलेले फिर्यादी संदीप घुगे (वय ४३) हे रात्री जेवण करून घराबाहेर शतपावली करत असताना, दोन मोटारसायकलवरून सहा जण तेथे आले. त्यातील एका गाडीवर विशाल हौशीराम खेमनर (रा. अंभोरे), प्रवीण ठकाजी पुणेकर व सुदर्शन शिवाजी श्रीराम (दोघे रा. डिग्रस) हे होते. विशाल व प्रवीण यांनी घुगे यांना पाहताच पिस्तूल उपसून ‘तुझा कार्यक्रम आवरला’ असे म्हटले, तर सुदर्शन तलवार घेऊन त्यांच्या देशाने धावला.
प्रसंगावधान राखून घुगे यांनी घरात पळ काढत दरवाजा आतून बंद केला. हल्लेखोरांनी त्यांच्या दिशेने दोन राऊंड फायर केले, यातील एक गोळी दरवाजा छेदून आत शिरली. त्यानंतर आरोपींनी तलवारीने दरवाजा व खिडक्यांच्या काचा फोडून आत घुसण्याचा प्रयत्न केला. घुगे आणि त्यांचे कुटुंबीय घरात लपून बसल्याने मोठा अनर्थ टळला. ‘आज वाचलास, पण जिवंत सोडणार नाही’ अशी धमकी देत आरोपी घटनास्थळावरून फरार झाले.
या प्रकरणी संगमनेर पोलीस ठाण्यात विशाल खेमनर, प्रवीण पुणेकर, सुदर्शन श्रीराम आणि इतर तीन अनोळखी अशा एकूण ६ जणांविरुद्ध विविध कलमान्वये गुन्हा दाखल करण्यात आला आहे. घटनेची माहिती मिळताच पोलीस आणि अहिल्यानगर स्थानिक गुन्हे शाखेच्या पथकाने घटनास्थळी धाव घेतली. आरोपींचा शोध घेण्यासाठी पोलिसांची पथके रवाना करण्यात आली आहेत, मात्र दुपारपर्यंत कोणालाही पकडण्यात यश आले नव्हते.
