धक्कादायक घटना! बिलाच्या वादातून हॉटेल चालकाची कोयत्याने वार करून भरदिवसा हत्या, चुलत भाऊ गंभीर जखमी… अहिल्यानगर जिल्ह्यातील घटना

महाराष्ट्र संवाद न्यूज ऑनलाईन

श्रीरामपूर:

शहरातील नेवासा रोडवरील हॉटेल लक्ष्मीनारायण येथे हॉटेलच्या बिलाच्या किरकोळ वादावरून एका तरुण हॉटेल चालकाची कोयत्याने वार करून भरदिवसा निर्घृण हत्या करण्यात आल्याची खळबळजनक घटना शनिवारी दुपारी ४ वाजेच्या सुमारास घडली आहे. या प्राणघातक हल्ल्यात हॉटेलचे तरुण चालक-मालक आकाश शेखर दुबय्या (वेंकटरामन) यांचा जागीच मृत्यू झाला, तर त्यांचा चुलत भाऊ कुणाल कैलास दुबय्या हा गंभीर जखमी झाला आहे. 

या प्रकरणी पोलिसांनी आरोपी सुरेश सतीश जाधव (रा. खिलारी वस्ती) याला ताब्यात घेतले आहे. याबाबत अधिक माहिती अशी की, नेवासा रोडवरील हॉटेल लक्ष्मी नारायण येथे काहीजण जेवणासाठी आले होते. जेवण झाल्यानंतर बिलाच्या रकमेवरून त्यांची हॉटेल कर्मचाऱ्यांशी हुज्जत सुरू झाली. वाद वाढत असल्याचे पाहून हॉटेलचे मालक आकाश दुबय्या तिथे आले आणि त्यांनी बिल पूर्ण देण्यास सांगितले.

याचा राग मनात धरून जेवणासाठी आलेल्यांपैकी एकाने आकाश यांच्या डोक्यावर कोयत्याने भीषण वार केले. आपल्या भावाला वाचवण्यासाठी कुणाल दुबय्या तात्काळ मदतीला धावला, मात्र आरोपींनी त्याच्यावरही कोयत्याने सपासप वार करून त्याला गंभीर जखमी केले.

घटनेनंतर आकाश दुबय्या यांना तातडीने साखर कामगार रुग्णालयात नेण्यात आले, परंतु प्रमुख वैद्यकीय अधिकारी डॉ. रवींद्र जगधने यांनी त्यांना मृत घोषित केले. जखमी कुणाल दुबय्या यांच्यावर सध्या कामगार रुग्णालयात उपचार सुरू आहेत. या संपूर्ण झटापटीत मुख्य आरोपी सुरेश जाधव हा देखील जखमी झाला असून, त्याच्यावर पोलीस संरक्षणात साखर कामगार रुग्णालयात उपचार सुरू आहेत.

आरोपी सुरेश जाधव हा नेवासा रोडला बस स्टँडसमोर चिकन टिक्क्याची गाडी चालवतो. भरदिवसा घडलेल्या या थरारक हत्याकांडामुळे श्रीरामपूर आणि अहिल्यानगर परिसरात कायदा व सुव्यवस्थेचा प्रश्न पुन्हा एकदा ऐरणीवर आला असून, पोलीस या घटनेचा पुढील तपास करत आहेत.