घारगाव पोलिसांची कारवाई: येठेवाडी शिवारात बेकायदेशीर वाळू वाहतूक करणारा डंपर जप्त, १० लाख २० हजारांचा मुद्देमाल हस्तगत

महाराष्ट्र संवाद न्यूज ऑनलाईन
संगमनेर:
घारगाव पोलीस स्टेशनच्या हद्दीत बेकायदेशीर वाळू वाहतुकीवर पोलिसांनी मोठी कारवाई केली आहे. येठेवाडी गावाच्या शिवारातून अवैध वाळू घेऊन जाणाऱ्या एका लाल रंगाच्या टाटा डंपरवर पोलिसांनी छापा टाकून चालकाला ताब्यात घेतले आहे. या कारवाईत पोलिसांनी एकूण १० लाख २० हजार रुपये किमतीचा मुद्देमाल जप्त केला आहे.
मिळालेल्या माहितीनुसार, १३ जुलै २०२६ रोजी रात्री दहा वाजण्याच्या सुमारास घारगाव पोलीस स्टेशनचे पोलीस निरीक्षक बाबासाहेब बोरसे यांना एका गोपनीय बातमीदाराकडून माहिती मिळाली. येठेवाडी गावाच्या शिवारातून एक लाल रंगाचा टाटा कंपनीचा डंपर (क्रमांक MH 20 DT 0239) बेकायदेशीररीत्या वाळू भरून १९ मैल मार्गे घारगावच्या दिशेने जाणार असल्याची खात्रीशीर माहिती मिळाली होती.
या माहितीच्या आधारे पोलीस निरीक्षकांनी तातडीने पोलीस हेडकॉन्स्टेबल विलास कोकाटे, पोलीस कॉन्स्टेबल प्रमोद गाडेकर आणि पोलीस कॉन्स्टेबल सुभाष शिवाजी बोडखे यांना कारवाईचे आदेश दिले.
पोलीस पथकाने दोन पंचांना सोबत घेऊन खाजगी वाहनाने जाऊन सापळा रचला. रात्री पावणे अकरा वाजण्याच्या सुमारास माहिती मिळालेला लाल रंगाचा डंपर येताना दिसला. पोलिसांनी प्राईड हॉटेलजवळ या डंपरला थांबण्याचा इशारा केला. डंपर बाजूला घेऊन चालकाकडे वाळू वाहतुकीच्या परवान्याबाबत विचारणा केली असता, त्याच्याकडे कोणताही वैध परवाना नसल्याचे समोर आले.
पोलिसांनी दोन पंचांसमक्ष डंपर चालकाला नाव आणि पत्ता विचारला असता, त्याने आपले नाव चंद्रकांत यमनाजी रोडे (वय ४२ वर्षे, रा. येठेवाडी, ता. संगमनेर, जि. अहिल्यानगर) असल्याचे सांगितले. डंपरची तपासणी केली असता त्यात अंदाजे २०,००० रुपये किमतीची २ ब्रास बेकायदेशीर वाळू मिळून आली. तसेच १० लाख रुपये किमतीचा लाल रंगाचा टाटा ९१२ डंपर असा एकूण १० लाख २० हजार रुपयांचा मुद्देमाल पोलिसांनी पंचांसमक्ष जप्त केला.
याप्रकरणी चालकाकडे अधिक चौकशी केली असता, ही वाळू गोरख उर्फ सचिन रावसाहेब रोडे (रा. येठेवाडी, ता. संगमनेर) याने मुळा नदीपात्रातून भरून आणण्यास सांगितल्याचे चालकाने कबूल केले. पोलिसांनी डंपर चालकाला ताब्यात घेतले असून, घारगाव पोलीस ठाण्यात याप्रकरणी बेकायदेशीर वाळू उपसा आणि वाहतुकीचा गुन्हा दाखल करण्याची प्रक्रिया सुरू करण्यात आली आहे. या घटनेचा पुढील तपास घारगाव पोलीस करत आहेत.