दिल्लीतील विद्यार्थी आंदोलनावरील लाठीमाराच्या विरोधक आक्रमक: राहुल गांधींनी मागितला पंतप्रधान मोदी, अमित शहा अन् धर्मेंद्र प्रधान यांचा राजीनामा

महाराष्ट्र संवाद न्यूज ऑनलाईन

नवी दिल्ली: 

जंतर मंतर मैदानावर सीजेपी आंदोलनादरम्यान विद्यार्थ्यांवर झालेल्या लाठीमाराच्या घटनेनंतर देशातील राजकीय वातावरण चांगलेच तापले आहे. या प्रकरणावर काँग्रेस खासदार आणि लोकसभा विरोधी पक्षनेते राहुल गांधी यांनी केंद्र सरकारवर अत्यंत घणाघाती टीका केली आहे. 

राहुल गांधी यांनी या घटनेचा तीव्र निषेध करत केवळ केंद्रीय शिक्षण मंत्री धर्मेंद्र प्रधान यांनीच नव्हे, तर केंद्रीय गृहमंत्री अमित शहा आणि पंतप्रधान नरेंद्र मोदी यांनीही आपल्या पदाचा तत्काळ राजीनामा द्यावा, अशी थेट मागणी लावून धरली आहे. तसेच घडलेल्या या संपूर्ण प्रकरणावर पंतप्रधान मोदी यांनी देशातील विद्यार्थ्यांची जाहीर माफी मागावी, असेही त्यांनी ठणकावून सांगितले आहे.

घटनेनंतर राहुल गांधी यांनी माध्यमांशी संवाद साधताना सांगितले की, संसदेत विद्यार्थ्यांच्या भवितव्याशी संबंधित हा महत्त्वाचा प्रश्न मांडण्यासाठी त्यांनी लोकसभा अध्यक्ष ओम बिर्ला यांची भेट घेतली होती. मात्र, या विषयावर चर्चेसाठी सरकारशी बोलावे लागेल असे उत्तर अध्यक्षांनी दिल्याचे त्यांनी स्पष्ट केले.

देश घडवणाऱ्या तरुणांवर आणि विद्यार्थ्यांवर लाठीचार्ज करणे ही त्यांची गाऱ्हाणी ऐकून घेण्याची किंवा त्यांना हाताळण्याची योग्य पद्धत मुळीच नाही. सध्या देशातील संपूर्ण शिक्षण व्यवस्थेवर राष्ट्रीय स्वयंसेवक संघाने ताबा मिळवला असून विद्यापीठांच्या कुलगुरूपदी प्रचारकांचीच नियुक्ती केली जात असल्याचा गंभीर आरोपही त्यांनी यावेळी केला. शिक्षण क्षेत्रावर वाढता व्यापारी प्रभाव आणि तरुणांसमोरील रोजगाराचे संकट यावर भाष्य करत त्यांनी केंद्र सरकार विद्यार्थ्यांचा आवाज जाणीवपूर्वक दाबण्याचा प्रयत्न करत असल्याचे म्हटले.

दरम्यान, आंदोलनादरम्यान झालेल्या लाठीमारात अनेक विद्यार्थी जखमी झाले आहेत. राहुल गांधी आणि काँग्रेस खासदार प्रियांका गांधी यांनी दिल्लीतील आरएमएल रुग्णालयात जाऊन जखमी आंदोलक विद्यार्थ्यांची भेट घेतली आणि त्यांच्या प्रकृतीची विचारपूस केली. एका बाजूला दिल्लीत शेतकऱ्यांची महासभा सुरू असतानाच दुसरीकडे विद्यार्थ्यांचे हे उग्र आंदोलन पेटल्यामुळे केंद्र सरकारसमोर मोठे दुहेरी संकट उभे राहिले आहे.