संगमनेरमध्ये विवाह सोहळ्यांसाठी ‘आचारसंहिता’ लागू; रात्री १० नंतर डीजे बंद

महाराष्ट्र संवाद न्यूज ऑनलाईन 

संगमनेर:

संगमनेर शहरासह तालुक्यात आता सर्व विवाह सोहळे वेळेत आणि मुहूर्तावर पार पडणार असून रात्री १० वाजेनंतर डीजे व बँड वाजवण्यावर पूर्णपणे बंदी घालणारी नवी आचारसंहिता लागू करण्यात आली आहे. 

विवाह सोहळ्यांमधील वाढता अनिष्ट पायंडा, वेळेचा अपव्यय आणि कायद्याचे होणारे उल्लंघन रोखण्यासाठी संगमनेर तालुका लॉन्स व मंगल कार्यालय असोसिएशनचे अध्यक्ष गोरख वसंतराव कुटे यांच्या पुढाकारातून आणि संगमनेर शहर पोलीस स्टेशनचे पोलीस उपनिरीक्षक संतोष पगारे यांच्या मार्गदर्शनाखाली वसंत लॉन्स येथे आयोजित संयुक्त बैठकीत हा महत्त्वपूर्ण निर्णय घेण्यात आला.

सध्या विवाह सोहळ्यांमध्ये रात्री उशिरापर्यंत कर्कश्श आवाजात चालणारे हळदीचे कार्यक्रम आणि लग्नाची वेळ टळून गेल्यानंतरही निघणाऱ्या मिरवणुकींमुळे पाहुण्यांपासून ते मंगलकार्याशी निगडीत प्रत्येक घटकाला मनस्ताप सहन करावा लागत आहे. या सर्व गोष्टींना चाप लावून आपली संस्कृती जपण्यासाठी तसेच कायद्याच्या चौकटीत राहून उत्सव साजरा करण्यासाठी लॉन्स व मंगल कार्यालय चालक, केटरर्स, पुरोहित, फोटोग्राफर आणि निवेदक यांची ही विशेष बैठक पार पडली.

कुटे म्हणाले, या बैठकीत झालेल्या निर्णयानुसार रात्री १० नंतर डीजे अथवा बँड वाजवणे, रात्री ११ नंतर फोटोग्राफी व व्हिडीओग्राफी करणे आणि रात्री साडेअकरानंतर लॉन्स किंवा मंगल कार्यालये उघडी ठेवण्यास सक्त मनाई करण्यात आली असून विवाह सोहळ्याशी निगडीत लॉन्स चालक, भटजी, केटरर, छायाचित्रकार यांच्यासाठीही अंतर्गत नियमावली लागू करण्यात आली आहे.

या बैठकीत संघटनेचे पदाधिकारी अभिजित ढोले, सागर नागरे, रोहिदास धुमाळ, वरूण गुंजाळ, प्रीतम जाधव, ओंकार कुटे, राजू कुटे, भाऊ जाखडी, कैलास जोशी, संकेत मुळे, संदीप शेळके, किरण डोंगरे, सुनील रहाणे, साई दिघे, नीलेश मिसाळ, राजेंद्र गाडेकर, समीर सराफ, निखिल उपासनी, अनिकेत फटांगरे, ऋत्विक रहाणे, उत्कर्ष जोशी, शाम महाराज, चेतन मुळे आणि किशोर रहाणे यांनी विविध मुद्द्यांवर मते मांडून चर्चेत सहभाग घेतला.

या प्रसंगी संगमनेर शहर व परिसर परिसरातील मंगल कार्यालये व लॉन्सचे चालक-मालक, मॅनेजर, फोटोग्राफर, आचारी, भटजी यांच्यासह विविध एजन्सीचे प्रतिनिधी मोठ्या संख्येने उपस्थित होते.