संगमनेरमध्ये ‘बाजारपेठ व्यापारी मित्र मंडळा’चा ऐतिहासिक निर्णय; यंदा गणपती वर्गणीसाठी वापरणार ‘डिजिटल पावती ॲप’

महाराष्ट्र संवाद न्यूज ऑनलाईन 

संगमनेर: 

दरवर्षी नवनवीन आणि अभिनव उपक्रमांची परंपरा जपणाऱ्या संगमनेर येथील प्रसिद्ध ‘बाजारपेठ व्यापारी मित्र मंडळा’ने यंदाच्या गणेशोत्सवात ‘डिजिटल इंडिया’ आणि पर्यावरण संवर्धनाचा संदेश देत कागदी पावती पुस्तकांचा वापर पूर्णपणे बंद करण्याचा निर्णय घेतला आहे. वर्गणी संकलनासाठी ‘डिजिटल पावती पुस्तक’ वापरणारे बाजारपेठ व्यापारी मित्र मंडळ हे संगमनेर शहरातील पहिलेच मंडळ ठरले आहे.

गणेशोत्सवाच्या वर्गणीसाठी दरवर्षी मोठ्या प्रमाणावर कागदी पावत्या छापल्या जातात. मात्र, डिजिटल युगाची गरज ओळखून मंडळाचे मार्गदर्शक व नगरसेवक योगेश (चिकू) जाजू यांच्या संकल्पनेतून हे विशेष मोबाईल ॲप्लिकेशन तयार करण्यात आले आहे. आता मंडळाचे कार्यकर्ते घरोघरी आणि दुकानांमध्ये जाताना पावती पुस्तक न नेता मोबाईलमधील ॲपद्वारे वर्गणी जमा करतील. वर्गणीदारांना त्यांची डिजिटल पावती तत्काळ व्हॉट्सॲप किंवा मेसेजद्वारे मोबाईलवर प्राप्त होईल.

या निर्णयामुळे हजारो कागदांची बचत होऊन प्रत्यक्ष वृक्षसंवर्धनाला मदत होणार आहे. याशिवाय कागदी पावत्यांवर छापलेल्या श्री गणपती बाप्पाच्या चित्रांची रस्त्यावर किंवा कचऱ्यात पडून होणारी विटंबना पूर्णपणे टळणार आहे. पावती छपाईचा खर्च आणि कार्यकर्त्यांचा वेळ वाचण्यासोबतच वर्गणीदारांकडेही त्यांची पावती मोबाईलवर सुरक्षित राहणार आहे.

तंत्रज्ञानाची कास धरून निसर्गाचे रक्षण करणारा हा उपक्रम संगमनेरमधील इतर सर्व मंडळांसाठी प्रेरणादायी ठरेल, असा विश्वास मंडळाचे अध्यक्ष सुधीर क्षीरसागर, उपाध्यक्ष शिवमृत बोखारे, खजिनदार राजेश जोशी, कार्याध्यक्ष कपिल टाक आणि सचिव कुणाल डंबिर यांनी व्यक्त केला आहे. मार्गदर्शक व नगरसेवक योगेश जाजू यांच्या या संकल्पनेचे व मंडळाच्या सर्व पदाधिकाऱ्यांच्या पुढाकाराचे संपूर्ण संगमनेरकरांकडून आणि गणेशभक्तांकडून विशेष कौतुक होत आहे.