श्रीरामपूर शहर व परिसरात वाढत्या अंमली पदार्थाच्या व्यसनाधीनतेला अटकाव घालण्यासाठी आणि तरुणांमध्ये जागृती निर्माण करण्यासाठी श्रीरामपूर पोलिसांच्या वतीने उद्या, शुक्रवारी एका भव्य जनजागृती रॅलीचे आयोजन करण्यात आले आहे. नशा मुक्त अभियानाअंतर्गत आयोजित या उपक्रमाद्वारे ‘ड्रग फ्री श्रीरामपूर’चा नारा देण्यात येणार असून, या रॅलीत श्रीरामपूरकरांनी उत्स्फूर्तपणे सहभागी व्हावे, असे आवाहन अपर पोलिस अधीक्षक सोमनाथ वाघचौरे यांनी केले आहे.
ही भव्य जनजागृती रॅली उद्या सकाळी साडेसात वाजता आर.एन.बी. कॉलेजच्या क्रीडांगणावरून सुरू होणार आहे. या कार्यक्रमाला नगर जिल्ह्याचे पालकमंत्री राधाकृष्ण विखे पाटील, जिल्हाधिकारी पंकज आशिया तसेच जिल्हा पोलीस अधीक्षक मुमक्का सुदर्शन यांच्यासह विविध क्षेत्रांतील प्रमुख मान्यवरांची विशेष उपस्थिती लाभणार आहे. रॅलीच्या माध्यमातून व्यसनमुक्तीचा संदेश देत समाजातील प्रत्येक घटकाला या लढ्यात एकत्र आणण्याचा पोलिसांचा मानस आहे.
या जनजागृती मोहिमेत श्रीरामपूर शहर व परिसरातील सर्व शाळा आणि महाविद्यालयांचे विद्यार्थी मोठ्या संख्येने सहभागी होणार आहेत. विद्यार्थ्यांसोबतच विविध स्वयंसेवी संस्था, शैक्षणिक व सामाजिक क्षेत्रातील मान्यवर, सुजाण नागरिक, महिला मंडळे तसेच शासकीय व निमशासकीय कार्यालयांमधील अधिकारी आणि कर्मचाऱ्यांनाही या उपक्रमात सामील होण्याचे आमंत्रण देण्यात आले आहे. या रॅलीसाठी पांढरा टी-शर्ट, स्पोर्ट्स पॅन्ट आणि स्पोर्ट्स शूज असा विशिष्ट ड्रेसकोड निश्चित करण्यात आला आहे. श्रीरामपूरला व्यसनमुक्त करण्यासाठी आणि या ज्वलंत सामाजिक प्रश्नाला पाठिंबा दर्शवण्यासाठी सर्व नागरिकांनी वेळेवर उपस्थित राहून ही रॅली यशस्वी करावी, अशी विनंती पोलीस प्रशासनाच्या वतीने करण्यात आली आहे.
