अवैध गुटखा माफियांचे कंबरडे मोडले; स्थानिक गुन्हे शाखेची तब्बल ९४ लाख ६८ हजारांच्या मुद्देमालासह ५८ आरोपींवर धडक कारवाई

महाराष्ट्र संवाद न्यूज ऑनलाईन

अहिल्यानगर:

अहिल्यानगर जिल्ह्यात अवैध गुटखा, मावा, पानमसाला आणि सुगंधित तंबाखूची विक्री करणाऱ्या माफियांविरोधात स्थानिक गुन्हे शाखेने मोठी धडक मोहीम राबवत जोरदार दणका दिला आहे. 

पोलीस अधीक्षक मुम्मका सुदर्शन यांच्या विशेष आदेशानुसार राबवण्यात आलेल्या या मोहिमेत गुन्हे शाखेने जिल्ह्यात विविध ठिकाणी छापे टाकून तब्बल ९४ लाख ६८ हजार २९० रुपयांचा मुद्देमाल जप्त केला असून ५८ आरोपींच्या मुसक्या आवळल्या आहेत.

जिल्ह्यात अवैध गुटखा व मावा विक्रीचे जाळे समूळ नष्ट करण्यासाठी पोलीस अधीक्षक मुम्मका सुदर्शन यांनी स्थानिक गुन्हे शाखेला विशेष कारवाईचे निर्देश दिले होते. या सूचनांचे गांभीर्याने पालन करत स्थानिक गुन्हे शाखेचे पोलीस निरीक्षक संतोष मुटकुळे यांनी तात्काळ पोलीस अधिकारी व अंमलदारांची विशेष पथके तैनात केली. या पथकांनी जिल्ह्यातील अवैध मावा, पानमसाला, गुटखा आणि सुगंधित तंबाखूचा साठा व विक्री करणाऱ्या इसमांची गुप्ते माहिती काढण्यास सुरुवात केली.

त्यानंतर १५ जून २०२६ ते २० ऑगस्ट २०२६ या कालावधीत स्थानिक गुन्हे शाखेच्या पथकांनी अहिल्यानगर जिल्ह्यातील विविध पोलीस स्टेशनच्या हद्दीत धडक छापे मारले. या विशेष मोहिमेदरम्यान एकूण ४१ गुन्हे दाखल करण्यात आले असून ५८ आरोपींना अटक करण्यात आली आहे. या सर्व कारवायांमध्ये ९४ लाख ६८ हजार २९० रुपयांचा अवैध साठा व मुद्देमाल पोलिसांनी हस्तगत केला आहे.

अहिल्यानगर जिल्ह्यात अवैध गुटखा व मावा विक्री करणाऱ्यांविरोधात यापुढेही अशीच कडक आणि सातत्यपूर्ण कारवाई सुरूच राहील, असा स्पष्ट इशारा स्थानिक गुन्हे शाखेने दिला आहे. पोलीस अधीक्षक मुम्मका सुदर्शन यांच्या मार्गदर्शन आणि सूचनेनुसार स्थानिक गुन्हे शाखेच्या अधिकारी व कर्मचाऱ्यांनी ही यशस्वी कामगिरी पार पाडली आहे.