एका दुःखद प्रसंगासाठी एकत्र आलेल्या नातेवाईकांवर नियतीने आणखी एक भीषण आघात केला आहे. नातेवाईकाच्या दशक्रिया विधीच्या मदतीसाठी आलेल्या एका ६० वर्षीय महिलेचा विद्युत तारेचा तीव्र धक्का लागून जागीच दुर्दैवी मृत्यू झाला. धांदरफळ बुद्रुक येथे मंगळवारी रात्री पावणेदहा वाजेच्या सुमारास घडलेल्या या काळजाचा ठोका चुकवणाऱ्या घटनेमुळे धांदरफळ आणि प्रवरानगर परिसरात प्रचंड हळहळ व्यक्त केली जात आहे.
ललिता सुनील थेटे (वय ६०, रा. भगवतीपूर, प्रवरानगर) असे या दुर्दैवी घटनेत प्राण गमावलेल्या महिलेचे नाव आहे. धांदरफळ बुद्रुक येथील तोरकडी कुटुंबातील नातेवाईकाच्या दशक्रिया विधीनिमित्त त्या तीन-चार दिवसांपूर्वीच मदतीसाठी आल्या होत्या. बुधवारी पार पडणाऱ्या विधीच्या आदल्या दिवशी सर्व पाहुणे-रावळे एकत्र जमले होते. दिवसभर घरकामात हातभार लावल्यानंतर रात्रीच्या वेळी सर्वजण गप्पा मारत बसले होते. दरम्यान, कांद्याच्या चाळीत कुत्रे किंवा मांजरी जाऊ नयेत म्हणून ललिता थेटे या शेजारी असलेल्या चाळीचा लोखंडी दरवाजा लावण्यासाठी गेल्या.
दरवाजा लावताना बाजूला असलेली विद्युत तार लोखंडी कुंपणाच्या संपर्कात आलेली होती. तसेच त्या ठिकाणी ओलावा असल्याने दरवाजाला हात लावताच ललिता यांना विजेचा अतिशय तीव्र धक्का बसला. हा झटका इतका भीषण होता की अवघ्या काही मिनिटांतच त्या जागीच गतप्राण झाल्या. काही फुटांवरच ही घटना घडल्याने नातेवाईकांनी तात्काळ तिकडे धाव घेतली. सुरुवातीला त्यांना साप चावल्याचा संशय आला, मात्र प्रसंगावधान राखून लाकडाच्या साहाय्याने त्यांना विद्युत प्रवाहापासून बाजूला करण्यात आले.
घटनेनंतर त्यांना तात्काळ घुलेवाडी येथील ग्रामीण रुग्णालयात दाखल करण्यात आले, मात्र वैद्यकीय अधिकाऱ्यांनी त्यांना मृत घोषित केले. शवविच्छेदनानंतर मृतदेह शोकाकुल नातेवाईकांच्या ताब्यात देण्यात आला. या प्रकरणी संगमनेर तालुका पोलीस ठाण्यात अकस्मात मृत्यूची नोंद करण्यात आली असून पोलीस पुढील तपास करत आहेत. एका दुःखद प्रसंगाला सावरण्यासाठी आलेल्या कुटुंबावर ललिता यांच्या रूपाने पुन्हा दुहेरी दुःखाचा डोंगर कोसळल्याने संपूर्ण परिसरात शोककळा पसरली आहे.
