घारगाव पोलिसांची जुगार अड्ड्यावर धाड: २ लाख ५ हजार रुपयांच्या मुद्देमालासह ५ आरोपी ताब्यात

महाराष्ट्र संवाद न्यूज ऑनलाईन

संगमनेर:

सारोळे पठार शिवारात पत्र्याच्या शेडच्या आडोशाला सुरू असलेल्या जुगार अड्ड्यावर घारगाव पोलिसांनी अचानक छापा टाकून ५ आरोपींना रंगेहात पकडले आहे. या कारवाईत रोख रक्कम, तीन मोटारसायकली आणि पाच मोबाईल असा एकूण २ लाख ५ हजार ८५० रुपयांचा मुद्देमाल जप्त करण्यात आला आहे.

दिनांक २१ ऑगस्ट २०२६ रोजी घारगाव पोलीस ठाण्याचे पोलीस निरीक्षक बाबासाहेब बोरसे यांना गुप्त बातमीदाराकडून माहिती मिळाली की, सारोळे पठार गावाच्या शिवारात बबन मुरलीधर फटांगरे यांच्या शेतातील पत्र्याच्या शेडच्या आडोशाला काही इसम तिरट नावाचा हार-जितीचा जुगार खेळत आहेत. बातमीच्या आधारे पोलीस पथकाने पंचांसह छापा टाकला असता, त्या ठिकाणी पैशांची पैज लावून जुगार खेळणारे ५ जण आढळून आले.

पोलिसांनी केलेल्या या कारवाईत गणेश बाळासाहेब घुले (वय ३१, रा. सारोळे पठार), रमेश हरिभाऊ मोहिते (वय ३८, रा. सारोळे पठार), संतोष रामकृष्ण यशवंत (वय ४७, रा. सारोळे पठार), किरण लक्ष्मण मोहिते (वय ३७, रा. सारोळे पठार) आणि रामदास भिका घुले (वय ५५, रा. सावरगाव घुले) या पाच जणांना ताब्यात घेण्यात आले आहे. आरोपींच्या ताब्यातून ५,८५० रुपयांची रोख रक्कम, १,५०,००० रुपये किमतीच्या तीन मोटारसायकल आणि ५०,००० रुपये किमतीचे पाच मोबाईल असा एकूण २,०५,८५० रुपयांचा मुद्देमाल पोलिसांनी जप्त केला आहे.

याप्रकरणी घारगाव पोलीस ठाण्यात महाराष्ट्र जुगार कायदा कलम १२(अ) प्रमाणे गुन्हा दाखल करण्यात आला आहे. सदरची धडक कारवाई अहमदनगरचे पोलीस अधीक्षक राकेश ओला, अपर पोलीस अधीक्षक सोमनाथ वाघचौरे, उपविभागीय पोलीस अधिकारी कुणाल सोनवणे यांच्या मार्गदर्शनाखाली पोलीस निरीक्षक बाबासाहेब बोरसे, सहाय्यक फौजदार नारायण ढोकरे, पोलीस हवालदार बाबूराव गोडे, प्रमोद गाडेकर, सुभाष बोडखे आणि चांगदेव नेहे यांच्या पथकाने केली आहे.